Siat ki shipai Syria, da ka erbih, iap 1,300ngut hajan Damascus

Damascus, 21 Nailar:
La ngeit ba ki don haduh 1,300ngut ki briew, kiba la iap, ha ka jinghiar thma bad siat ka Syria, da ki dawai ba long bih, ha ki rud nong jong ka Damascus mynta ka sngi balang bad la shim ba katei ka dei ka jingpynhiar kput kaba jur, ha kaba ki liang pyrshah, ki shim ba dei ban tohkit mardor da ki ri jong ka pyrthei.
Ka Bilat, ka kren shai, ba ia katei ka kam, kan leit rah mar mar sha United Nations, ba kan tohkit, wat la ka Syria, ka kyntait, ba ka siat ia ki paidbah, da ki dawai bih ba pyniap briew.
La iathuh ba katei ka jingjia, ka dei ha ka por 3baje mynta mynstep, ha ka por ba ki paidbah, ki briew, ki dang ia don ha la ki jong ki iing. Na ka liang jong ka Syrian National Coalition, ka shim ba ka jingiap, ka poi sha ka 650ngut.
Ka jingiap jong ki briew, la iathuh, ba ka dei, da kaba kim lah shuh ban ring mynsiem, mar ia siat ia kitei ki lyer bih.
La iathuh da ki riew ialeh pyrshah, ba la siat da ki roket, ia kitei ki lyer bih, ha kaba la siat ha ki bynta jong ka Ain Tarma, Zamalki bad Jobar, mynta dang step phyrngab.
Ha katei ka jingiap mynta ka sngi, la iathuh, ba ki don shibun ki khynnah ruh, kiba la iap, ha kaba ka jingiap jongki, ka long ba ka met jongki ka pjah sam sam, nangta ka mih sa ka tyrtho na shyntur bad katei ka dei ka rukom iap jong ki briew, kiba don ha ki hospital bapher, kiba leit shah sumar.