Ki liengsuin ia pom jong ka Pakistan, ki la wan her mynta ka step sha u pud jong ka India, ha ki bynta jong ka Nowshera jong ka Jylla Jammu and Kashmir. Mar kumta ki liengsuin ia pom jong ka India, ki la beh thong bad pynphai dien ia ki bad ha katei ka jingjia, la iathuh ba kawei ka liengsuin ia pom jong ka Pakistan, ka la shah siat ha ka India, ha ki bynta jong ka Lam Valley jong ka Nowshera.
Ka liengsuin iapom ka India, kaba hap ha Budgam, kaba don hajan ka shnong Garend Kalaan jong ka Jammu and Kashmir.
Ha katei ka jing ia pyni bor ha suin, ka India ka la duh ruh ia kawei ka liengsuin MIG 21 bad uwei u nongniah, ula jah rngai bad ka Pakistan, ka kam ba ka la ioh bat ia utei u nongniah liengsuin jong ka India.
U nongkren jong ki shipai Pakistan, u pynthikna mynta ka sngi, ba ki la ioh kem ia uwei u nongniah liengsuin iapom jong ka India, wat la kham mynshwa, ki kam ba ki ioh kem ia arngut ki nongniah liengsuin, ha kaba uwei ula mynsaw.
“Don tang uwei u nongniah liengsuin ha ki shipai jong ka Pakistan” ong U Major General Asif Ghafoor.
Ka jinghap jong ka liengsuin MIG 21 jong ka India, ka dei ha ka por ba ki ialeh pyrshah bad ki liengsuin ia pom jong ka Pakistan, ha ka por ba ki wan tur sha u pud jong ka India, ha ka por 11.37 mynta ka step.
Kiwei ki lad khubor ki iathuh ba ka don ka jinghap jong kawei ka Mi 17 helicopter, ha ka por 10.05 mynstep bad la iathuh ba la lap ruh ia 5 tylli ki met iap na katei ka jaka bad la iathuh ba uwei na kiba iap, u dei uba na katei hi ka shnong, katba saw ngut kiwei pat, la ngeit ba ki dei ki shipai suin, kiba don lang ha katei ka helicopter. Katei ka helicopter, ka dei kaba don jingthut ha ka jingiaid lynti jongka bad kam dei satia kaba hap, ha ka jing ia siat bad ki liengsuin ia pom jong ka Pakistan.
Phi don ban ong eiei?