Siat iap ka ISIS, ia 43 ngut, 16 ngut ki kynthei

Karachi, 13 Jymmang:
Ka kynhun ka ISIS kaba don ha Pakistan ka la pynher syrngiew ia ki paidbah jong katei ka ri ha kaba mynta ka step ki dkhot katei ka seng ki la rung ha kawei ka Bus bad ki la siat iap haduh 43 ngut ki briew na shyllangmat jong ki bad na kitei ki 43 ngut ngut 16 ngut ki dei ki kynthei. Katei ka jingjia ka la jia mynta ka step ha ki thain shathie ka Pakistan.
Ki briew kiba la iohi pyllein ia katei ka jingjia, ki la iathuh ba ki dkhot ka ISIS ki la wan da ka thuk thuk bad ki la pynieng ia katei ka bus kaba dang thmu ban leit sha ka Shiite community centre ha nongbah Karachi, shuwa ban ther kuli ki lehnoh ISIS ki la pyrta ‘pyniap ia ki baroh’. Kiba la shah pyniap ki dei na ka jaitbynriew Ismaili , ki rit paid jong ka Shi’ite Muslim. Ha katei ka jingjia nalor ki 43 ngut ba la iap, ki don sa 13 ngut kiba lait im hynrei ki la mynsaw jur, tang mar ia dep katei ka jingjia ki lehnoh ISIS ki la phet bak da ki lai tylli ki thuk thuk jong ki, hapoh shi kynta hadien katei ka jingjia ka kynhun ba la tip kum ka Jundullah lane ki shipai u blei ki la kam ba ki la leh ia katei ka kam.
‘Kine ki briew kiba la shah pyniap ki dei ki Ismaili kaba ngi khot ia ki ki kafir lane ki bym ngeit, ngi phah saw ngut ban hiar thmam ha ki sng ban wan ngin hiar thma sa ia ki Ismailis, Shi’ites bad ki Kristan’ ong u nongaiktien jong katei ka seng u Ahmed Marwat . Ka Jundullah ka dei ka kynhun lehnoh ba ia pait na ka Taliban na Pakistan hynrei kaba la pynbna ba ka la iasoh bad ka ISIS naduh u naiwieng jong u snem ba la dep.