Shyrkhei bah U Faleiro

U Luizinho Faleiro, uba dei u nongialam ba rangbah jong ka seng Congress, u dei shisha, u briew uba tbit bad uba shemphang ha ka kam sain pyrthei, namar ba u kren bang kren thiang bad u da niewtang ia ki kam pyrshah BJP bad ki jingiadei jong ki seng trai ri bad katei ka seng kaba synshar ha ka sorkar pdeng.U Faleiro, u sngewthuh shai, ba ki jingkren jongu, ki long ki bym bang shuh satia sha kiwei ki bynta jong ka Ri India bad u shem ba lehse ki kyntien jongu, ki dang rung ha tyllong dohnud jong u paidlang ka Ri Khasi Jaintia (wat la ym dei satia ha Garo Hills) bad dei na kata ka daw, ba u sngew bang ban pynher ia ka sur pyrshah CAB, ka sur kynnoh ia ki seng trai ri, halor ka nongrim jong ka NEDA bad kiwei ki kyntien, kiba u shim, ba ki dei ki sobjek pdeng ha Khasi bad Jaintia Hills.
Ka la dei U Faleiro, ba un kren diaw mynsiem, ba ka seng Congress lane ki ishu pyntieng koh tympan jongu, kim trei kam satia ha Garo Hills, ha kaba u kandidet, uba la iai iakhun da ki bun bunsien, um lah satia ban pynliem ia ki Sangma rangbah jong ka Garo Hills bad kam dei tang katta, hynrei wat ha ka elekshon shiteng samoi ha Selsella, ka seng Congress, ka la duh noh ia ka ktem jongka bad katei ka pyni shai, ba ka Garo Hills, kam pdiang satia ia U Mukul Sangma, kum u nong ialam ba rangbah jong katei ka thain bad ki dang iai shaniah ia ka iing jong U PA Sangma.
Ngim tip ia ki sngi, ki ban sa wan, hynrei ka kynhun jong U Faleiro, la iohi, kumba ka la nang ngam nang ngam bad imat, kumba kan sa duh jait ha ri thor jong ka Ri india bad dei na kata ka daw, ki sdang ban pynskhem jubor ia la ki jong ki khohwah, halor ka nongrim pyrshah niam, pyrshah doh masi, pyrshah CAB, pyrshah NRC bad sa ka jingieid ia ki jaitbynriew rit paid ha Ri Khasi Jaintia.
Tangba u paidlang ka Ri Khasi Jaintia, ngim tip, u pyrkhat kumno, hadien ka jingjied ia ka seng Congress ha ka elekshon MP ba dang shu dep, namar ba katei ka seng, ka don tang 52ngut ki dkhot ha Lok Sabbha bad ka bym ia kot wat tang shi powa, na ka jingdon ki dkhot ha katei ka dorbar bah bad kumta ia ka roi ka par, ngim lah lait na ka sorkar BJP. [rms]