Shwa ka rakhe 50 snem, thaw Association ki khynnah skul barim ka St. Vianney’s HSS

Nongpoh:Ki khynnah skul barim ka St. Vianney’s Higher Secondary School, kaba don ha Umsohlait, Mawhati ha Ri Bhoi, hynnin ka sngi Saitjain ki la thaw da kawei ka kynhun kaba la tip kum ka St. Vianney’s Past Pupil Association, kata ka long ban lum ban lang ia baroh ki khynnah skul barim, na ka bynta ban wanrah ia ka jingiajan bad ka jingiatylli hapdeng baroh ki khynnah skul barim ka St. Vianney HSS bad ha kajuh ruh ka por khang ba yn nanglah ban kyntiew shuh shuh ia katei ka skul.

Kiba la donlang ha katei ka sngi ba la thaw ia katei ka Association, ki kynthup ia u Fr. Leo Iawbor, Principal katei ka skul, nangta u Fr. Sherman Khongshei, Headmaster katei ka skul, ki dkhot jong ka School Member Committee lem bad kiwei. Lyngba katei ka sngi la jied ia ki nongkitkam jong katei ka Past Pupil Association, ha kaba u Bah Mathias Mynsong, u la shah jied kum u President, u Bah Richard L. Marshillong kum u General Secretary, katba u Principal bad Headmaster jong ka St. Vianney HSS kin long kum ki Adviser hapoh katei ka Association.

Katei ka Association, ka don ruh ia ka jingangnud ban iarap kyrpang ha ka jingpynkhreh ka skul, ha ka ban rakhe ia ka jingdap ba 50 snem katei ka skul bad kaba yn sa plie ha ka 21 tarik u Rymphang mynta u snem. Kumta na ka liang ka Association, ka khot ka wer ia baroh ki khynnah skul barim jong ka St. Vianney HSS ba kin wan iasnohktilang bad ka Association ryngkat bad ka skul, khnang ba katei ka jingrakhe dap 50 snem kan long kaba shongkun.