Shwa ban pdiang Synod, kwah ka shnong Mawtari, ia ka surok ba 1 KM

Nongpoh:Ki nongialam nongshong na ka shnong Mawtari, ka shnong kaba hap ha poh ka Umsning Constituency bad kaba dei ruh ka shnong kaba dang don hapdeng ka jing pynkhreh ban pdiang ia ka jing iaseng Synod Rang bah ka Ri Bhoi, ki la pynpaw ba ki kwah eh ba ka sorkar lyngba ka tnat PWD, ba kin shna pynbha ne ban siangrong noh ia ka surok kaba 1 km bad kaba la sahteng naduh mynshwa.

Haba iadei bad ka jingkwah ka shnong ban pynbha ia katei ka surok, u Bah Bishar Nongphlang, Rangbah Shnong ka Mawtari bad uba dei ruh u Tymmen Basan hapoh ka Balang, ba ka jingkwah ban pynbha ia katei ka surok, kam dei tang na ka shnong, hynrei ka Balang Presbyterian Mawtari hi ka kwah ba katei ka surok ba kan bha, khnang ba kan pynsuk ha ka leit ka wan ha kane ka Jingiaseng Synod ka ban sa long ha u Lber mynta u snem, namar katei ka surok ka dei kaba donkam eh, na bynta ban pynsuk ha ka leit ka wan ki paidbah nongwan Jingiaseng Synod.

Shuh shuh, u la ong ruh ba katei ka surok ba 1 km bad kaba la donkam kyrkieh ban siangrong, ka dei kaba don ha ki bynta ka shnong Lumjyrmi sha Mawtari, kumta lada ia katei ka surok yn lah ban shna bha ne ban siangrong, kan sa pynsuk na bynta kito ki nongwan Jingiaseng Synod bad kiba wan na ki thain Umden, Nongpoh lem bad kiwei ki shnong kiba don ha Shnong Quinine sharum.

U la ong ruh lyngba katei ka surok, kata naduh haba rung na Umran Niangbyrnai shaduh Quinine, ki bynta jong katei ka surok ki bha bad kiba pynsuk ia ka leit ka wan u paidbah, hynrei ka long pat kaei kaei kaba sngewkhia eh ba tang namar ka jingsniew ha ki bynta katei ka surok ba tang 1 km, ka la pynjynjar eh ia ki paidbah bad kaba kat haduh kine ki sngi bad khamtam eh na bynta ki riewngeit kiba thmu ban leit sha katei ka Jingiaseng Synod ha katei ka Shnong.
Kumta haba iadei bad katei ka bynta ba khyndiat eh jong katei ka surok, ka Balang Mawtari ha ryngkat bad ka Dorbar Shnong, ki la kyntu ia ka sorkar lyngba ma ka la dei ka por ia ka sorkar lyngba ka tnat PWD ba kan shimkhia ban sdang noh ia ka jingtrei bad ban siang rong noh, namar jin lada lah ban pyndep noh ia katei ka surok ba tang khyndiat, kan da long ruh ka jingkyrkhu kaba khraw ia ki paidbah kiba shnong ha katei ka thain.