Nongpoh: Ha shwa ba ki dkhot hapoh ka Regional Committee, ka Komiti kaba deipeit halor ka jingiapynbeit pud hapdeng ka Meghalaya bad Assam, ki la thmu ban leit kynduh ia ki heh sorkar ja jylla Assam, ki dkhot katei ka Regional Committee kaba deipeit halor ki kam iakajia pud ha ki jaka kiba hap ha Ri Bhoi, ki la pynlong ia kawei ka jingialang kaba kyrpang ha Nongpoh bad hadien ba la kut katei ka jingialang ki sa hiar beit beit sha Guwahati.
Ia katei ka Regional Committee, la khlieh da u Bah Prestone Tynsong kum u Chairman, ha ryngkat ki dkhot bad kiba dei ki MLA na Ri Bhoi, kiba kynthup ia u Bah Sosthenes Sohtun, MLA Jirang, u Bah Mayrald Born Syiem, MLA Nongpoh bad u Dasakhiatbha Lamare, MLA na Mawhati.
La ioh jingtip ba ka jaka jong ka jingiakynduh hapdeng ki heh na Meghalaya bad Assam ka dei ha Vivanta Taj Hotel ha Guwahati, ha kaba lyngba katei ka jingiakynduh hapdeng kitei ki heh kin sa iakren halor ki kam ba iakajia pud hapdeng ka Meghalaya bad Assam ha ki jaka kiba hap ha Ri Bhoi District.
Hadien ba la kut katei ka jingialang, ha ka sngi kaba bud u Chairman ka Regional Committee bad ki dkhot ka Komiti, ha ryngkat ki dkhot ki heh jong ka sorkar Assam, kin sa leit ban jurip ia ki bynta ba shait jia ka jingiakajia pud hapdeng ka Meghalaya bad Assam, ha kaba katkum ba la ioh jingtip la ong ba ki jaka ba kin pynlong ia katei ka jingleit jurip ka dei ha Khanapara lem bad ha ki katto katne ki jaka ka thain Pillangkata.
Phi don ban ong eiei?