Shwa ban kha, ula ioh syrnot sngi kha, ong ka KSU; halor ka bhah pule doctor, ki bar jylla

Shillong:Ka Khasi Students’ Union (KSU) mynhynnin ka sngi, ka la ujor ha ka myntri ka tnad ka koit ka khiah ka kong Ampa reen Lyngdoh hadien ba ka la lap ba ki don ki bar jylla kiba ioh bhah pule doctor na ka bhah pule jong ka jylla.

Haba kren mynhynnin ka sngi, u president ka KSU u bah Lambokstarwel Marngar, u la ong ba la don lei uwei uba la ioh syrnod sngi kha shwa ban kha bad kane ka paw, ha ka kot ka slab a la ioh ka KSU ba uwei u bar jylla uba ioh bhah ban pule doctor na bhah ka sorkar Meghalaya, u ioh syrnod sngi kha u snem 2002 katba la kha u snem 2003.

“U don uwei uba la ioh syrnod sngi kha lypa, u kha ha 2003, katba ka syrnod sngi kha, u la ioh ha 2003. Ju don mo ban ai syrnod sngi kha shi snem shwa ban kha, hato la tip lypa ba u dei u kynthei ne shynrang”, la ong u bah Lambokstarwell.
U bah Lambokstar u la ong ba ka myntri ka la ai ka jingpynthikna ba kan bishar biang ia ki kot ki sla bad ban weng syndon ia kiba leh thok. U la ong ba kumno ki briew na Bihar ki ioh bhah ha kane ka jylla Meghalaya.

“Ki briew na Bihar, naei naei ki wan ioh bhah hangne ha jylla jong ngi, nga sngew ba ka long kaei kaei ka bym lah ban pdiang”, la ong u bah Lambokstar.
U la ong ba ha ka jingshisha, katkum ka kyndon, kiban ioh bhah ki dei tang kiba dei hok ki nongshong shnong ba pura ka jylla katba kiba ioh bhah ki don tang ka Provisional Permanent Resident (PPR) kaba treikam tang hapoh 3, 6 bnai bad 12 bnai bad kim don ka Indigenous Inhabitant for Permanent Resident (IIPR) bad hadien ba la kut kine ki bnai, ki dei ne em ki nongshong shnong ka jylla katba ka jingpule doctor ka shim por 3-4 ne 5 snem. “Kane ka dei ka jingbakla kaba khraw na ka sorkar jylla, kaba shu pdiang lymmuh ia ki kot ki sla”, u la ong.

U la ong ba lada aplai syrnod sngi kha hadien 10 ne 12 snem, ka dei ban don ka hukum na ka Kashari, bad balei pat ka sorkar ka ai khun khadduh ia ki bar jylla.
U la ong ba la iakren ruh ba kumno uba rit mark u ioh hajrong, uba heh u don shapoh bad kane kam dei ban long kaba dei bad ka sorkar ka dei ban pynbeit ia kane bad pynlong ia ka jingjied kaba shai.