Shillong:U nongmih khmat jong ka Jowai konstitwensi u bah Wailadmiki Shylla, uba long ruh ha kajuh ka por kum u Chairman jong ka karkhana pynmih dewbilat ba nyngkong duh jong ka jylla ka Mawmluh Cherra Cement limited (MCCL), u la iathuh ba un sa leit sha Kolkata ban leit jngoh bad peit sani bha, ia ki rukom pyniaid kam jong ka Bhavika commercial private limited (BCPL) ha shwa ba kin soi soskular bad kane ka kompani ban iatreilang bad ka sorkar jylla, khnang ban lah ban pynmih biang, ia ka dewbilat ba bha bad paka kum ha ki por kiba mynshwa.
Haba kren sha ki nongthoh khubor u Bah Wailadmiki Shylla, u la iathuh, ba ka BCPL ka dei kawei na ki lai tylli ki kompeni kaba la shim bynta ha ka expression of interest (Eoi) ba la pynmih da ka Sorkar jylla.
Katba ar tylli pat ki kompeni, ki la sangeh noh ban ia shim bynta, ha kane ka jingiakren, katba na ka liang jong ka BCPL ka la wan shakhmat ban pyni sha ka Sorkar, ba da kumno kin khyllie biang ia ka jingpynmih dewbilat ha kane ka karkhana ba lah rim bha.
U Chairman, u la ong ruh ba hadien ba u la ioh jingtip, kiba bniah bad shai un sa phah ia ki jingdonkam baroh sha u myntri rangbah ban peit thuh bad bishar ha shwa ba ka kynhun myntri jong ka sorkar jylla, kan ai jingbit pura ia ka kompeni ban soi ia ka soskular.
Kum ban shu pynkynmaw ba ka kynhun myntri Sorkar ka la shim rai ha ka 19tarik u Naitung 2021,ia ka jingwanrah jong ka tnat, ban wanrah da ka jingiasnohkti lang jong ka Sorkar bad kino kino ki kompani shimet ban pyniaid ia ka MCCL. Ka jing shimrai ka wan hadien ba na ka liang jong ka sorkar jylla hi kam lah ban mang ia ka pisa ba 190klur tyngka, na ka bynta ban pynkhie im biang ia kane ka karkhana pynmih dewbilat na ka daw ka jingduna ha ka ioh ka kot jong ka jylla.
U bah Shylla, u la ong ba ha shwa ba ka Sorkar kan shim ia ka rai, halor kane ka bynta, ka la dep pynkhreh lypa ia ka kynhun wad bniah ba kumno yn lah ban pynkhie im biang ia kane ka bynta.
U la ong shuh ba u la iaid shakhmat bad kyrmen, ba kane ka jingiatreilang bad ki kompeni ryngkat ka sorkar jylla kan long kaba jop ban wanrah biang ia ka MCCL.
Haba iathuh ia ka jinglong trai, u la ong ba ka sorkar hi kan long trai da kumba 51persen, katba ka kompeni kan longtrai tang kumba 49persen, kaba mut ka jingiapher hi kan long tang kumba 1persen.
U shylla ruh un sa pdiang IA ki kompani tad bn myntoi ialade ,namar um don idea lane um dei u engineer jong Kane ka lain, u dei tang u ex lecturer(english) jong ka oxford university
Kaba sngewsih ban tip ba kata ka BCPL ne ka Bhavika Commercial Private Limited kam dei hi ruh ka Cement Company. Bad ka bym ju kham bna ne ioh sngew hi ruh, Kumno ka MDA Govt kanud ban risk ne ban aiti ban pyn iaid kat ia Cement Industry ha kum kine ki Company tit. Balei kam aiti ha ki Cement Industry kiba lah kham paw bad tikna ba ki lah ban pyniaid ne wan rah jingmyntoi kaba paka ia ka thain Sohra bad ka State hi baroh kawei.