Shillong: Sa 3 taiew shuwa ba poi ka elekshon shiteng samoi ha Ampati konstitwensi ka tnad elekshon ka la ioh ban kurup pisa T.4 lak tyngka, ka tnad ba peit pyrman ia ka elekshon ka Static Surveillance Team ryngkat ki pulit bad ki bor District ka la ioh kurup T.4 lak ha ka sngi saitjaiñ jong ka taiew na ka shnong Garobadha, South West Garo Hills.
Katkum ki kyndon elekshon la khang iano iano ban rah pisa palat ia ka T.4 lak tyngka , ki bor District jong ka SWGH ki la iathuh ba la ioh kurup ia katei ka pisa na kawei ka kali ha Garobadha bad haba ki talasi ia katei ka kali ki ioh bat T.4,29,800 tyngka. Ia katei ka pisa la ioh kurup na u Secretary jong ka VEC bad u la ong ba ka dei ka pisa jong ka skhim NREGS, ka jingtohkit halor katei ka bynta ka dang iaid shakhmat.