Shillong: Myn hynnin ka sngi ha ka por shiteng sngi eiei u bah David Lyngdoh uba ki ju khot sin u bah Jyllud u phet na kti ki pulit shuwa ban leit rah ia u sha District & Session Court. Katkum ki tyllong khubor kiba la ioh lum la iathuh ba shuwa ba ki pulit kin leit rah sha kashari, u bah Jyllud u la ong ba u sam paiñkhana bad ki la pynrung ia u hapoh paiñkhana kaba don hapoh ka ophis Deputy Commissioner, East Khasi Hills, Shillong hynrei hadien katto katne por ba um mih shuh, ki la kyndang ia ka paiñkhana bad ki lap ba um don shuh bad u la phet tuh na kawei ka jingkhangit rit (Skylight) kaba don hapoh katei ka paiñkhana.
Kawei na ki jingkhang iit, kaba la lait phet U Bah Jyllud na ophis U DC Shillong.
Tang mar kumta hi ki pulit ki la thwet ha kylleng ka nongbah Shillong, khamtam ha ki jaka kiba don marjan bad ka ophis Deputy Commissioner bad ki la phah jingtip ruh sha kiwei pat ki thanad pulit ban thwet ia u bah Jyllud. Ka Superitendent of Police ka East Khasi Hills ka kong C A Lyngwa ka la ong ba ki pulit ki la pynap shrip ha kiba bun ki jaka ban ioh kem biang ia u bah Jyllud uba ju lait phet na ka por sha ka por na kti ki pulit. Ka la ong ba u dei ruh uba la shah kem ha kiba bun ki kes bad ki kam runar jong u.
U bah Jyllud u dei uba la shah kem bunsien na ki kam runar runar jong u ba kynthup ka kam tuh bad ka kam prongtuh ha ing briew ha ka por mynmiet ban jyllud bad syrpud syrpai ia ki kynthei kiba dang ioh thiah. Kham mynshuwa u bah Jyllud u la lait phet na kti ki pulit ha Civil Hospital, Shillong ha ka por ba leit ialam ia u ban phah eksamin hadien ba u shah kem bad hadien la ioh kem biang ia u bad la set ha Ri-Bhoi, hynrei mynta ka sngi la wanrah ban ialam sha kashari bad katba ka por ban ialam sha kashari kam pat dei la buh ia u ha DC ophis ryngkat ka jingpahara ki pulit hynrei shuwa ban ialam noh sha kashari u la sam paiñkhana bad na paiñkhana u la ioh ban phet biang.
Phi don ban ong eiei?