Shuh shuh, shaphang ka nam jong ka Nartiang

Da u Bah Philip Marwein

Kum ka jingpynbud shuh shuh ia ka jingthoh ba nga la thoh shaphang ka jingpaw nam jong ka Shnong Nartiang na la mih ha ki kotkhubor khasi babun, nga kwah ban ai shuh shuh katto katne ki jingshisha ia kiba nga la kum ioh iehnoh. Kine ki dei ba ka shnong Nartiang ka don kumba 500 tnum iing (ym kumba 150 kumba la iathuh u rangbah shnong) bad ki khliehbriew kynthei bad shynrang ki don kumba 2500 ngut. Ki nongrep ki bun bha ym tang 50 ngut namar jan baroh ki don khyndew lajong, ym kum ka shnong Moodop ba marjan. Ki nongbylla ruh ki don tangba ym da bun bad ka bai bylla ka dei T. 300/- bad don ruh ki ba ai 400 ne tyngkhat 500 tyngka shi sngi katkum ki jait jingtrei. Ki doktor ki don 2 ngut, ki Engineer 2 ngut, ki nonghikai skul 15 ngut, ki L.P skul 3 tylli, ki SSA 3 tylli, U P skul 3 tylli, H.S kawei.

Ha kaba iadei bad ka jingtyrwa knia ha ka Blei Durga ha ka por leh Puja ha Temple jong ka ha shnong Nartiang, mynshuwa eh, la tyrwa knia da ki khlieh briew hynrei, ynda la wan synshar ki Phareng ym tang ia ka hima Jaintiapur hynrei ia kiwei kiwei ki hima ruh, la khang pyrshah ban knia briew hynrei hadien la tyrwa knia noh da ki Blang Sohmoh. Mynta ruh la knia puja da ki Langsohmoh bun tylli ba noh bynta u Doloi, ki Lyngdoh bad kiwei. Ki Phareng, shuwa ban knia blang ki da test ia ka jinglehniam puja da kaba phah knia da u blang nar ban tip la ka jinglehniam da dei ia ka blei shisha Ne em. Ki nonglehniam puja ki leh shisha kumta bad ka la jia ba u nar ba knia u kylla blang nar da kaba pah blang shisha. Hadien katto katne por la pynsangeh noh ia ka knia puja da ka nar bad la leg noh da ki blang shisha.

Mynshuwa hapoh ka Raid Nartiang ki shnong ki ba don Lyngdoh knia ki dei ka Larnai, ka Nongdhar, ka Nongkrem, ka Nongmulieh, ka Takhniang bad ka Nartiang. Ki shnong ki ba hap ha ka Ilaka Nartiang ki dei ka Larnai, Sohphoh, Thadjamusem, Nongkharai, Bamkamar, Iongshiwit, Murathud, Nongdhar, Nongkyllep, Mookabeng, Mookhyniung, Kdiap, Umladang, Umbluh, Laru, Bambthong, Rakabah, Umtangting, Mungkbu, Bamkhne, Moorap, Moobakhon, Mookjat, Nongmoolieh, Sehlama, Ksehrynshang, Kremlawit, Mynsngat, Moodop, Moopliang, Kdohkule bad Nartiang.