Shu rai kyrkieh u VC, ban pyntreikam ïa ka NEP ha jylla, ong ka NEHUSU

Shillong:Ka NEHU Student Union (NEHUSU), ka la pynpaw ka jingsngewdiaw bad ka jingpyrshah halor ka jingrai kyrkieh u Vice Chancellor (VC) ka skulbah ban pyntrei kam ïa ka National Education Policy (NEP) 2020 naduh 1 tarik Nailar 2023.

Haba kren sha ki lad pathai khubor u Finance Secretary ka NEHUSU samla Mandor Diengdoh Swer, ula ong ba ki don shibun ki mat ha ka NEP 2020 kiba long kiba sngewtynnad bad kiba shongnia ban kyntiew bad ban wanrah jingkylla ïa ka pule puthi ha baroh kawei ka ri India bad Meghalaya.

“Ngim pyrshah ïa ka NEP, hynrei ngi sngew ba kane ka rai jong u VC ban pyntreikam naduh 1 tarik Nailar ha baroh ki College kiba hab hapoh ka jingkhmih ka NEHU ka long kaba kyrkieh palat namar ki dang don shibun ki kam ba donkam ban leh na ka bynta ban pynthikna ba ka jingpyntreikam ïa ka NEP ha Meghalaya kan long kaba ïaid beit ïaid ryntih,” la ong u samla Mandor.
U samla Mandor, ula ong ba donkam sa kumba shi snem eiei ban pynkhreh ïa ki jingdonkam na ka bynta ban pynthikna ba ka jingpyntreikam ïa ka NEP ha Meghalaya kan long kaba seisoh bad kaba ïaid beit ïaid ryntih.

Ula kam ba ki dang shibun ki College bad ki jaka Pule ha kylleng ka Meghalaya kiba dang duna ha ka jingdon ki nonghikai kiba tbit ïa ki sobjek bapher bapher bad ki don ruh ki College ha sor bad khap sor ki bym don lut ki tnat Pule.

Haba bynrap ïa kane, u Vice President ka NEHUSU u samla Easterson Sohtun ula ong ba kane ka jingrai kyrkieh jong u VC ban pyntreikam noh ïa ka NEP naduh 1 tarik Nailar 2023 ka paw hi ba une u VC ula shim rai marwei khlem da kheiñ snep ïa ka rai jong ka Academic Council ka NEHU.
U samla Easterson ula ong ba wat na ka liang u Myntri ka tnat pule puthi u Rakkam Sangma dang shen ula kren shai ba ki don ki College ha Meghalaya ki bym pat kot bor ban pyntreikam ïa ka NEP mynta u snem bad dei namar kane ba ki nonghikai bad ki samla pule ki sngewdiaw bha halor kane ka jingrai kyrkieh u VC.