Shu pan jingshai, khlem phah siew khajna rOng ka heh Income Tax ia ki heh spah Khasi

Shillong, 12 Nailar:
Ka tnad Income Tax jong ka sorkar pdeng ka la panjubab na ki heh spah Khasi ha kane ka jylla  kiba thep pisa da ki phewlak ha ka shi sngi.
Haba iakren bad ka ophisar ka tnad Income Tax, ka Kong WP Syiem, ka la iathuh ba ka Income Tax Department kam shym la phah siew khajna ia ki heh spah Khasi hynrei ka shu pan jubab na ki namar ba ki don bun kiba la lah ban thep pisa haduh da ki lak ha ka shi bnai.
“Ngi pan jubab na ki kumno ki ioh ban thep pisa, ka jingtrei kam jongki bad kiwei”, ka la ong.
Ka jingong ba phah siew khajna ia ki riewlum ne rit paid kim deisatia, hynrei ka dei tang ka pan jingshai halor ka jingioh kamai jongkida ki lak.
Ia ka jingtip ba ki heh spah Khasi ki don pisa, ka Income Tax ka la tip na ka Core Banking jong ki bank bapher bapher bad katkum kajinglap jongki ia kito kiba thep pisa da ki lak, ka phah ia ka shithisha ki ba kin jubab kumno bad kaei ka kam kaba ki lah ban pynmih haduh katta katta.
Ka Kong Syiem ka la ong ba katkum ka jingsngew jong ka, ka la dei ka por ia ki riewlum ne ki rit paid ba kin siew noh ia ka khajna sha ka sorkar kum shi bynta ban noh synniang lem sha ka imlang sahlang namar ba kumba ka long mynta ki Khasi kiba riew spah kyrhai da ki hajar nalor ki nongtrei sorkar kiba la lah ban noh synniang lem kyndiatkynsoit sha ka sorkar.
“Haduh mynta ngi ki riewlum ngi la shah niew tang kum ki nongbam ei, namar ba ngim shym la noh synniang eiei hynrei ngi shu shim ia ka pisa ba la noh synniang kiwei”, la ong ka Kong Syiem.
Katkum ka jingiathuh, ki Khasi kim pat don satia kiba  don ha ka thup ban siew khajna katkum ka jingkamai jongki bad ki la shu bam jem beit khlem don kam siew khajna eiei sha ka sorkar wat la ki don kiba la riew spah bha bad iaryngkat bad kiwei ki briew kiba hap ban siew khajna.
Ia ka jingsiew khajna na ka jingkamai, la khein katkum ka jingioh kamai, kata uba rit u hap siew kaba rit bad uba heh u hap siew kabakham heh.
Kiba kamai 3 lak sha neng ha ka shi snem, ki hap ban siew khajna ne income tax, hynrei ki Khasi ne ki riewlum kim donkam ban siew khajna, namar ba dang khein kiba dang biej.