Shu khmied ka khlieh da poi ha Assam, la iohi lut ia ki kam pynroi ka BJP, ong u bah Hek

Shillong:U myntri sorkar jylla uba dei ruh u nongialam ka BJP u bah AL Hek ula kam ba ki paidbah ka Gambegre kin jied ia ka BJP namar ki kam pynroi kiba la theh ka sorkar BJP na Delhi.
Ka BJP ka la pyniakhun ia u Bernard R Marak ha kane ka elekshon shiteng samoi na Gambegre, uba dei ruh u MDC ka GHADC.

Haba kren mynta ka sngi, u bah Hek u la ong ba ka dawbah dawsan kaba khraw tam ba ki paidbah kin jied ia ka BJP, ka dei namar ka jingkhlain ban wanrah ia ki kam pynroi sha ki shnong ki thaw.
U la ai nuksa ba ha Assam tang shu khmied ka khlieh sha jrong, yn iohi lut ia ki kam pynroi kiba la leh ka sorkar BJP ha Assam bad kumjuh ki paidbah ha Meghalaya lada ki kwah ia ki kam pynroi, ki dei ban jied ia ka BJP.

“Shu khmied ia ka khlieh ynda la poi ha Assam, phin iohi lut ia ki kam pynroi kiba la leh ka BJP”, la kam u bah Hek.
Ka elekshon shiteng samoi ha Gambegre kan long ha ka 13 tarik mynta u bnai bad yn niew ha ka 23 tarik.
Ha kajuh ka por, u la ong ba ym don eiei ka jingsngew pher ia ka jingkynthah bad kynnoh ha ka por elekshon namar ba ka dei ka rukom bad kaba kongsan ka long ia ki paidbah ban bishar.