“Shu iathuh noh”

Shillong, 05 Rymphang: Ka sorkar jylla mynta ka sngi ka la pynthanda khyndiat ia ki nongtrei sorkar kiba kwah bat kam, long dkhot, ha ki shnong, ki seng da kaba ailad ba ia ki tangba halor ka kyndon ba ki dei ban pyntip mardor sha ka sorkar haba ki leh kumta.
Kane ka jingpynkylla ka sorkar, ka long hadien ba ka jingbuh por jong ka Synjuk Ki Nongsynshar Shnong na Bri u Hynniewtrep (SNSBH) ka la kut hynne ka sngi ka 5 tarik Rymphang, kaba dawa ba ka sorkar ka dei ban weng noh ia ka jingkhang lad noh ia ki nongtrei sorkar ban long rangbah shnong.
“Mynshwa, ngi la rai ba ki nongtrei sorkar kiba kwah ban long dkhot, kitkam shnong, ha ki seng, ki dei ban pan bor shwa na ka sorkar, hynrei mynta, ngi la shah ba kin bat kam, long dkhot tangba ki dei ban pyntip mardor sha ka sorkar haba ki leh kumta”, la ong u Myntri Rangbah ka jylla u Dr Mukul Sangma haba kren sha ki lad pathai khubor hadien ba la wai ka jingialang ka cabinet ne ka kynhun myntri mynta ka sngi.
Kane ka jingkylla ka sorkar  ia ka rai jongka, ka long hadien ba la mih ka jingpyrshah jur na ki rangbah shnong, ki seng sain pyrthei ha kane ka jylla.
“Ka sorkar ka la pynkylla ia ka Meghalaya Services (Conduct) Amendment Rules 2015 da kaba bsuh ia ka 20B ka Meghalaya Services (Conduct) Amendment Rules 2015 ka ong ki nongtrei sorkar kiba bat kam ha ka kam Rangbah Shnong, sengbhalang kin hap ban ai jingtip sha ka sorkar jylla wut wut ba ki bat ia ka kata ka kam”, la ong kane ka kyndon ba la pdiang ka sorkar mynta ka sngi.
Ka la ong ruh, “kito kiba la bat kam lypa, ki dei ban pyntip noh mardor sha ka sorkar”, la ong kane ka kyndon ka Meghalaya Services (Conduct) Amendment Rules 2015.
Hynrei, ka sorkar ka la shah laitluid ia ki nongtrei sorkar ban bat kam ha ki kynhun niam, ki jait kur ha kaba kane ka ain, kan nym treikam.
“Ngi la shim ban pynkylla ia ka rai kaba la pynbna kham mynshwa ha kaba iadei bad ka jingpynkylla ia ka Service Rules ia ki nongtrei sorkar hadien ba la ioh ia ka jingpynsngew na kiba bun ki paidbah”, la ong u Mukul Sangma.
“Halor ka jingmut ba la ioh na ki paidbah, ka sorkar ka la sngew dei ban thaw thymmai ia ka Service Rules ban wanrah ia ka jingshai phar ia baroh ban lait noh baroh ka jingsngew artatien na ki paidbah, la ong u Myntri Rangbah.
“Ka sorkar kam shym la khang ia ki nongtrei sorkar ban long dkhot ha ka dorbar shnong, ki kynhun seng ba la ithuh ka sorkar hynrei, ka shu ong ba ki dei ban pyntip shwa ia ka sorkar shwa ba kin shimti ia kata ka kam, hynrei da kane ka jingpynkylla mynta ka sngi, ka sorkar ka la pynkylla biang ba la shah ia ki ban long dkhot, ban bat kam tangba ki dei ban ai jingtip noh mardor mar ia shimti ia kata kata”, la ong biang  u Mukul.
Kane ka ain kaba la pdiang da ka sorkar, kan nym treikam ia ki kynhun niam, ki seng kur, la bynrap u Myntri Rangbah.