Shongshit u paidlang ka England, haduh 50hajar ngut kin leit sha Berlin, kiew ka bai tiket haduh T.80hajar

Ha shwa ka jingialehkai ban iaknieh ia ka nam lahduh ha ka Euro 2024, ki riewieid phutbol ka England, ki la ia khih khohreh ban wad tiket liengsuin, ban ioh sakhi da ki khmat briew jongki ha katei ka jingialehkai hapdeng ka England pyrshah ia ka Spain bad la antad, ba kin don kumba 50hajar ngut ki riew ieid phutbol ka England, ki ban sakhi da la ki jong ki khmat ha katei ka jingialehkai ban pynkut ia ka Euro 2024.

Kat haduh mynta ki bor pyniaid jong ka kam ialehkai, ki la ai haduh 10 hajar tylli ki tiket ia kito kiba leit peit kai, hynrei, la iathuh ba kin don bun bah, kiba dang wad tiket, ban poi sha ka Olympiastadion, kaba don ha Berlin bad kaba ngiam ia 71hajar ngut ki briew. Ha katei ka jingkhein, la shim namarkata ba ki nongpeit kai ka England, kin don ar shah ia kiba kyrshan ia ka Spain.

Mynta ki liengsuin, kiba iaid beit na London sha Berlin, ki la khapngiah lut bad ka bai hotel ruh ka la kiewdor shabneng, namar ba ki la ia bun bah kiba iaknieh jaka sah. Ka jingwad jaka sah bad tiket liengsuin ha google, ka la kiew haduh 250 percent ha ki 24 kynta ba ladep bad ka tiket, kaba duna dor eh, ka poi mynta sha ka 820 pound lane kaba long kumba T.88hajar ha ka pisa India.

Ka England, ka la shong tyrkhong, ha ka jingioh khusnam kiba heh ha ka kam ialehkai, kaba la poi mynta sha ka 58 snem kynthih bad mynta ka dei ka kabu kaba ki khmih lynti, ba kan wan urlong.