Ka dei ka jingialang paidbah, ka bym pat ju kham iohi satia, ha kine ki phew snem ba ladep. Hadien ka jingiakhih ban dawa ban pynkhlain ia ka MBOSE, ha u snem 2005, ha kaba ka don ka jingialum paidbah ha Madan Student, kaba la ia lum lymbung u paidlang ka Sor Shillong, hynrei ka jingialang, kaba long ha ka sngi saitjain ba ladep, ka long kaba nang kham heh shuh, ha kaba la ia lum lang u paidlang ka Ri Khasi Jaintia. Wat la na ka jingkhang jong ka Iewduh, ba kynjah ka Motphran bad ba ki taksi, kim shym la iaid kamai; ka la don ka jing i kynjah ruh jong ka Madan Student, ha Jaiaw Pdeng, hynrei katei ka madan, ka i shongshit bad khluit tar, mar ia mih ka kynhoi ka risa, ka put ka tem, da ka jing wan poi ki nong Mawlai kiba la ia poi khrui ha ka juh ka por bad kiba la wan iaid da ka kjat naduhMadan Heh, Phudmuri ter ter sha jingthang briew, St.Joseph bad lyngba ka Robert Hospital.
Ki nong Mawlai shuwa ban mih na ka shnong jong ki ki la pynlong ka jingiakynduhlang ha Madan heh bad hadien kata khrui ki la mih ryntih ban kam sha ka phang ka Madan student. Shuwa ba kin poi ka Madan student kam pat da dap than bada kam pat da shongshit than haduh katta katta, hynrei ha mar ba ka kynhun ki Mawlai ka la poi la iohi ba la sdang khih ka Madan na ki nongiakynhoi ryngkat ka rwai ‘Ban shu long mraw ha la ka jong ka ri phi hun seh mo kum u samla ka ri’.
Kham sa shiphang por hadien ba la wan poi ki nong Mawlai kiba jan dap da ki phew hajar ngut, la mih sa ki nongialam sengbhalang sha katei ka madan, tang khyndiat minit shuwa ban sdang ka jingialang ha ka por 12.30 nohsngi, la iohi smam u paidbah u la pyndap ia ka Madan student, ki rynsan baroh arliang ki la dap smam, ka madan ruh smam nangta la iohi ba ka surok ban hiar na Mission sha Madan student ka la dap hi smam. Nalor kitei la iohi ruh ba ki paidbah ki dang bun kiba sngap jingialang nalor ki tnum ing, kiba khongoid na ki jingkhang it jong ki. Haba shu khein kyllum ia ka ki briew kiba poi jingialang la kumno kumno kam duna shuh ia ka 50 hajar ngut.
Phi don ban ong eiei?