Shongshit ka iakop niah kali ha Ialong

Jowai, 25 Naiwieng:
Ka iakop pynher kali ha Ialong kaba la sdang mynta ka sngi ka la long kaba shongshit bha ha kaba haduh 33 ngut ki nongiashim bynta naduh na Delhi, Arunachal, Nagaland bad Assam nalor ki Khasi bad Jaintia ki la wan ban iashim bynta ha katei k jingiakop pynher kali ia kaba la pynlong ha ka shnong Ialong, ka shong kaba la tip kum ka Rural Tourism Village.
Ia kane ka iakop niah kali la pynbit pynbiang da ka East Jaintia Adventure and Moto Sports Association (EJAMSA) bad ka jingthmu ka long ban kyntiew ia ki kam jngoh kai pyrthei ha katei ka shnong bad kumjuh ruh ban ialap paidbah ha ka jingiadei bad ka rukom niah kali ban lait na ki jingjia aksiden.
Ka khusnam ha kane ka jingiakop ka long 50 hajar, 30 hajar bad 20 hajar tyngka ha ki lai kynhun kiba kynthup ia ka kynhun SUV, ka kynhun kaba 1300 CC sha neng bad 1300 CC shapoh nalor ki Trophy bad Syrnod (Certificates).
U ma Sambha Mallang (Wahlang) u la iathuh ba kum kane ka jingiakop la pynlong bunsien ha East Jaintia Hills ha ka thain Sutnga hynrei kane kadei ka sien nyngkong eh ha West Jaintia Hills.
U la ong ba kane ka jingiakop kan kyntiew ia ki kam jngoh kai pyrthei, kan iarap ruh ban pynshlur ia ki samla ka Jaintia Hills bad ha kajuh ka por ka long ruh ka jingialap na ka bynta ban long phikir bha ha kaba niah kali khnang ban lait na kino kino ki jingaksiden.
Ki la don haduh 33 ngut ki nongniah kali ba shyrkhei ki la wan iashim bynta kynthup ruh ia u Amanpreet Ahluwalia uba na Delhi uba la ju ioh bat teng ruh kum u National Champion lane u nongjop hapoh ka ri India.
Haba kren bad u Rupang, u Ahluwalia u la iaroh ia ka jaka kaba la pynlong ia kane ka jingiakop ha kaba u la ong, “Nga la don mynta la 16 snem ha kane ka kam ban leit iakop kylleng hynrei kane ka jaka ka long kaba itynnad shisha bad ka rukom pyniaid ruh ka long kaba biang bha. U la iaroh ia ki nongpyniaid kane ka jingiakop.
Kane ka jingiakop kan kut lashai kasngi Saitjain bad haba plie ia ka mynta ka sngi, ka BDO jong ka Thadlaskein Block ka kong B Blah ka la long ka kongsan ha ryngkat ka jingiadonlang ki rangbah na ka shnong Ialong kynthup ia u Rangbah Shnong u ma Bishar Shylla bad u Elnathan Pale.