Shillong: Ka lympung bah kaba ar jong ka seng ki nongtrei bylla sngi lane ki union kiba hapoh ka shatri jong ka Workers’ Power of Meghalaya (WPM) ka la long kaba shongkun bad kaba jop hynnin ka sngi, ha kaba ki la don 18 tylli baroh kiba la wan ban ïadon bynta.
Napdeng jong kine ki kynthup ïa ka Meghalaya ICAR Progressive Workers Union, ka All Meghalaya Security Workers Union, ka NESAC PWU, ka Meghalaya and Greater Shillong Hawkers and Street Vendors Association, All Meghalaya Muster Roll PWU, Ri-Bhoi Progressive Health Workers Union, ka West and SW PHWU, bad kiwei.
Ka mat pdeng jong kane ka lympung ka long ka jingïatylli ka wanrah ïa ka jingjop ha kaba ki nongïalam jong ki union bapher bapher na kylleng ka jylla ki la wan ban phylliew jingmut ïala ki jong ki jong ki jingshem ha ki kam kiba ki trei.
Lah ban kdew hangne ba ha ka lympyng kaba nyngkong eh jong kane, kata ha u bnai Kyllalyngkot jong u snem 2018, la rai ban seng ia ka federation ha kaba la don tang 5 tylli ki union, hynrei ka jingïatrei borbah jong ki nongïalam ka la lah ban ïarap seng mynta haduh 18 tylli ki union.
Haduh mynta kane ka federation ka dang pyrshang ban register ïa lade katba ki union kiba hapoh jong ka jingkdup jong ka pat ki la dep ban register katkum ka aiñ.
Kane ka Federation ka la buh ïa ki mat, kiba don haduh 30 tylli ki mat jingdawa, bad ïa kawei napdeng kita la lah ban pyn urlong, namar ka sorkar ka ba la pynkiew ïa ka tulop na ka T200 sha ka T300 shisngi jong ki minimum wage, katkum ki kyndon aiñ. La iathuh shuh shuh ba ki don bun ki union ki ïakynduh jingeh kumjuh ruh ki jingshah byrngem ha ki management, hynrei lyngba ka jingïarap met bad mynsiem jong ka seng Thma u Rangli u Juki lane ka TUR la lah ban kynjoh sha ka thong.
Haba kren ha kane ka lympung bah ka President jong ka WPM, ka kong Angelina Mary Hynñiewta ka la ong, “Ngi ïakynduh bun ki jingeh bad ngi wad ïa ki lad ki lynti bad lyngba ka jingïarap jong ka seng TUR ngi la ïoh ïa ka hok naduh ka por trei kumjuh ka hok ha ka jingsiew ba kynthup is ka provident fund.”
La ong ba dei lyngba ka jingdon jong ki union ba ki corporation ki la shong smiej namar ba ki buh da ki program ïakhih lane ki agitation ha kaba ki management kim banse ban pynkiew nyngkong ïa ka minimum wage.
Ka jingpynlong ïa ki rally kum ka jingdeng lama iong, ka ïarap ban ïoh ïa ka tulop kaba biang bad ruh ïa ka arrear.
Haba ïakren bad U Rupang, u bah Keneth Swer, General Secretary jong ka WPM ula pynpaw ka jingsngew nguh ïa baroh ki dkhot jong ki union bapher bapher kiba la pyllait por khnang ban ïa wan ban don bynta lang sha kane ka lympung bad pyni shisha ïa kata ka mynsiem ban ïakhun na ka bynta ka hok jong ki bad u la ong, “Kumba ngi leh ha ka convetion kaba nyngkong ha u snem uba lah dep kumta mynta ka kynti ruh ngin pynkhreh ïa ka People’s Charter ban aiti sha ki bor sorkar khnang ba ngin ïoh ïa ka hok jong ki nongbylla sngi.”
U bah Kenneth Swer u la ban shuh shuh da kaba kyntu ïa baroh ki nongbylla sngi ba kidei ban, “ïaleh khlem jingsheptign ne jingkynrandien ban ïoh ïa ka hok namar ka don ka aiñ kaba ïada ïa ki.”
Phi don ban ong eiei?