Shongkun ka jingpynkup burom,ia 38 ngut ki samla pule

Jowai, 6 Naiwieng: Ka Jaintia Youth Federation mynta ka sngi ka la pynkup burom haduh 38 ngut ki samla pule ha ka program kaba kyrpang kaba la tip kum ka   “Excellency Award 2015” kaba la long ha District Library Auditorium, Jowai.
U ma Sniawbhalang Dhar, uba dei u myntri ka sorkar ba dei peit ia ka tnad PWD u la long u kongsan katba u Chief Executive Member ka JHADC, u ma Thombor Shiwat bad u ma Deseous Pohshna, EM In charge Revenue Department ka JHADC ki la long ki Symbud kongsan.
La ia donlang ruh ka District School Education Officer, ka kong D. Khongiong, ka Charter President Rotary Club Jowai, kong EF Gatphoh, u MDC ma R. Tang, ki nonghikai ki khynnah skul bad ki nongialam ka JSU bad HNPF.
Kitei ki 38 ngut ki samla kiba la ioh ia ka Award na ka JYF ki kynthup naduh kito kiba la pass bha sha khmat ha ki exam kiba naduh ka SSLC, HSSLC, BA, B.Com, B.Sc, BE, B.Arch, B.Tech. BBA, MA, MSc, MA, MCom, ME, MTech, M.Arch wa ka MBA.
Napdeng kiba la ioh ia ka  award, u Dr. Rikil Chyrmang u dei uba dang shu pyndep ia ka Ph.D ha ka subject Economics na Jawaharlal Nehru University.U ma Sniawbhalang Dhar haba kren kum u kongsan u la ong ba dei tang ka jingminot bad ka jingtrei shitom kaba lah ban wanrah ia ka jingjop ha kane ka pyrthei kaba jur ka jingialeh Competetion. U la iaroh ia ka JYF kaba la pynlong ia kane ka program na ka bynta ban pynshlur bad ban ai mynsien ia ki samla pule.“Ngi donkam ban ithuh ruh ia kiwei ruh naduh ki officer sorkar, ki nongsynshar nongmihkhmat bad wat ia ki nongrem kiba trei shitom na ka bynta ka imlang ka sahlang”, la ong u ma Dhar.U CEM ka JHADC u la kyntu ia ki samla pule ban long kiba minot khang ba ka jingpyllut pynsep ki kmie ki kpa kan ym long sepei. U ma Deseous Pohshna u la kyntu ia ki khynnah skul ba kin long kiba donakor, kiba burom ia kiba halor. U la ong haba peit ia ka rukom riam rukom beit haduh ka rukom khapsniuh ki samla ha kine ki sngi ka long kaba ithamula ban peit.Kiwei pat ki nongkren ki kynthup ia u Joint Secretary ka JYF, u samla Brightstar Chyrmang, uba la ai ka jingkren ai khublei, u Secretary ka seng u Firmly Rymbai uba la ai ka jingkren pdiang.  U president ka JYF u la ai ka jingkren lamphrang. Ka kong EF Gatphoh bad ka kong D. Khongiong ruh ka la ai ki jingkren kiba pynmyntoi ia ki samla pule ha ryngkat ki ktien iaroh ia ka JYF. Ia ka jingialang la pyniaid da u ma Sannio Siangshai, Founder Vice President ka seng.