Shong ym pat ioh shong bha, 10 baje lada shah beh, ong ki nong iew

Shillong:Wat la ki nongshong die jingdie ha madan kiba don ha Iewduh, ki la ioh biang ia ka lad ban die ia ki mar rep ki jong ki hadien shibnai kynthih ba ka Sorkar Jylla ka la pynjari da ka jingkhangdam ha East Khasi Hills District, hadien ba ka khlam Covid-19 ka la wan ban lynshop tyngeh ha ka kynti kaba ar, hynrei ki briew kiba wan ban thied ban pet pat ki duna shaba palat bad kane ka la pynlong ia ki nongdie ba kin shu bret kai noh ia ki jingdie ki jong ki ynda la dei ka por janmiet.

Kitei ki nongshong die jingdie ki la iathuh ba ki ioh ban plie ia ki dukan jong ki tang arsien shitaiew bad ynda la dap 10 baje mynstep, ki la hap ban khang noh pynsted ia ki dukan jong ki, namar la wan hylla ki pulit bad ki magistrate bad baroh ki nongdie nongthied ki hap ban kohnguh bad mih pynstep namar ba don ka jingkhang khyrdop kylleng sawdong ka Iew.

Na ka liang jong kitei ki nongshong Iew ki la ud shi kat dei eh ia ka jingshem jynjar ka jong ki, namar tang shong ym pat ioh shong bha hap ban khang noh bad don khep ruh ba tang ban lut ka jingdie ka jong ki bad ban lait ka bret kai kim banse ban die duhnong noh bad tang ban ioh ban thied ban pet haiing hasem.