Shong thad sngi ki nongtrei karkhana Upper Shillong, bym don ding

Shillong, 9 Nohprah:
La don bun sngi, ba ka bor ding ha ki thain ka Upper Shillong ka la pynthud ia ka trei ka ktah bad ka kam ka jam ki paidbah, ha kaba naduh ka por 10 -10:30 baje myn step, ym don bording ha katei ka thain bad ka ding ka meh tad haduh ka por janmiet.
Ha kitei ki kynta bym don bor ding la iohi ba ki nongtrei ha ki karkhana dieng, ki kar khana welding ki shu shong thad sngi, namar ba ym long treikam khlem ka bording. Ha karkhana dieng la iathuh ba ki kam ki jam ki misteri ki thut bha, namar ba kim lah ban tar dieng khlem ka bor ding, ha ki karkhana shna jingkhang it jingkhang bah, kaba shna da ki nar la hap ban sangeh ia ki kam ki jam namar bym treikam ka welding khlem ding.
Ki nongtrei ha ki karkhana bapher bapher la iathuh ba ki hap ban trei tam ia ka por trei jong ki bad ki hap ban bteng ia ki kam ha ka por mynmiet, ban pyn iawan dur bad ka por ba ki shu shongkai ha ka por mynsngi. Ha ki thain Upper Shillong ym tang ki karkhana kiba la shah ktah namar ka jingbym biang ka bording, hynrei kiwei pat ki jaka treikam kiba hap ban trei lyngba ki kor kompitor , bad kiwei pat ki kam kum ki Xerox bad kiwei ki la shah ktah lut, bad katei ka la wanrah ka jingduh nong kaba khraw ia ki paidbah.
Ha ka jingiakren bad u nongthoh khubor, ki briew kiba don ha ki karkhana ot dieng, karkhana shna jingkhang, kiba la buhrieh kyrteng, ki la pynpaw ia la ki jong ki jong ki jingeh, bad ki la khnium ia ka tnad bording namar ka jingbym lah ban pynbiang ding ha ki thain Upper Shillong, khamtam ha kine ki sngi ba la dei ki por Krismas, ka por ba ki hap ban ia durut ka pynmih kamai ban ioh thied ia ki jingdonkam ha ing ha sem. Ki ki la kynnoh ruh ba katei ka tnad ka nang tang ban lum baiding katba kam shym la ai ka jingshakri kaba biang.