Shillong: Ki paidbah ka shnong Amdoh, ki lyng ngoh jur ia ka jing wan hiar thma ki khar Bangladesh. Ha dien lai sngi ba shah hiar thma ha ki khar Bangladesh na ka liang ki paid bah ka shnong Amdoh ki la ong ba ki don ha ka jing syier mynsiem hapoh shnong.
U Waheh shnong ka Amdoh u S. Bareh u la ong ba kane ka jing shah hiar thma ba thmu ban pyn mynsaw briew ka dei ka sien ka nyngkong bad ka la pyn lyngoh bad pyn ma ruh ia ki nong shong shnong.
“Hoid naduh ki por mynshwa ki don ki jing shah tuh kum ia u kwai, ki soh ki bad ki masi hynrei ban ong hi ba ki rung ha ing briew ban pom pyn mynsaw te kam pat ju don mynno mynno ruh” u la bynrap.
Uwei u riew paidbah u bym shym la kwah ban pyn paw kyrteng u la iathuh ba ka jing wan dawa pisa khar Bangladesh na ing ka pyn lyngoh bha ia ki paidbah nong shong shnong baroh.
“Ngi lah ban ong ba ki briew nong Bangladesh kiba shong marjan bad ka shnong jong ngi ki im ja da ka ba ia die ia thied bad ngi ki nong India naduh ki por ba kam pat don kata ka ri Bangladesh ne ka jylla Meghalaya” u la bynrap.
Na ka liang u Pratap Bareh u ba la mynsaw ha ka jing shah pom bad ki khar Bangladesh u la ong ba kane kajing jia ka pyn lyngngoh bad pyn shong syier ia ki nong shong shnong baroh.
I long kmie Chiang Bareh I la ong ba ka jing nud jong ki khar Bangladeshi ban tur sha ka shnong dei namar ka jing tlot palat ki shipai BSF bad ki pulit ka jylla ki ba shong ha Muktapur.
“Ki khar Bangla kim tieng ban hiar thma ia I paidbah khasi namar pulit ka jylla kim don suloi, na ka ta ka daw ngi dawa na ka sorkar ba ka dei ban ai suloi ia ki pulit ka jylla ban iada ia ngi” I la bynrap.
Naka liang u President Synjuk ki waheh shnong u Kolman Poshna u la ong ba namar ka jing bym don bording ka shnong ka la pynsuk ruh ia ki khar Bangladesh ban tur sha ki shnong Khasi khlem da don jing tieng shuh. U la ong ruh ba un sah thoh sha ka sorkar Meghalay ba ban pynsted ia ka jing sam bording sha ki shnong ki ba don ha khappud khnang ba ki paidbah kin long sngain ha la ki shnong.
Phi don ban ong eiei?