Shillong: Ka long kaba sngew danda, hynrei ka long ruh ka jingshisha ba myn hynnin ka sngi, U Dr Donkupar Roy, lamphang dorbar Jylla, u hap ban shong da ka sumo ban poi sha Umniuh Tmar bad ka daw, ka long namar ba ka don ka jingtwa khyndew ha ka shnong Mawkyrnot, ka jaka kaba jngai kumba 4 Kilometre na Pynursla.
U Dr Donkupar Roy lem bad kiwei de ki riew rangbah, kiba sahkut ha ka jingtwa surok ha Mawkyrnot (sha ka mon) ka bos saw khmut kaba wan na Nongjri ban leit sha Shillong, kaba sahkut hapdeng surok, ha ka Sngi Palei:Rupang
U Dr Donkupar Roy, ula poi ha katei ka jaka ba twa, ha ka por kumba 12.30 nohsngi ha ryngkat bad ki pulit kiba synran ia ka kali jongu, hynrei ynda poi ha katei ka jaka, ka la don ka jingsahkut kali bad ka daw, ka long namar ba ka don ka jinghap maw ha surok bad nangta sa kawei pat ka daw bah, ka long ba kawei ka bos saw, kaba don ia u number ML01 7424, ka la sahkut hapdeng surok.
Katei ka jingjia, ka la pynbitar ia u lamphang dorbar, ha kaba ula pyrshang ban iakren bad ki paidbah ban shu ia ngiat noh ia katei ka surok, sha ka jaka kaba kham kylluid, hynrei namar ba u nongniah um shym don ha katei ka jaka, kumta katei ka jingthmu kam larkam satia. La iohsngew ba u lamphang dorbar ula phone briew ruh ha katei ka por, ha kaba ula ong ruh ba dei ban ejahar pyrshah ia utei u nongniah kali, ba khlem akor, uba la phet noh na katei ka jaka.
Hadien kumba 15 minit eiei, ha katei ka jingsahkut kali, u lamphang, ula hap ban iaid sha shiliang da kaba bat ia ki kti na ki nar jong katei ka surok, katba ki kjat pat ba hap iuh ha ka ktieh.
Ym tang u lamphang dorbar, hynrei U Ma Lahkmen Rymbui, myntri ka pule puthi, ka Kong Grace Kharpuri MDC, ki hap ban iaid lem da katei kajuh ka lynti da kaba shu snoh ia ka kti na ki nar kali bad ban iuh ia ki kjat ha ka ktieh jong katei ka surok.
Hadien ba kitei ki heh sorkar, ki la jam sha lyngba, la ioh khubor, ba ki la wan ki puh shilum lai tylli, ha kaba ki la tan ia katei ka kali bad ki la kynriah noh ia u maw sha rud surok bad ka la long biang ban iaid kali, ha ka por 3.30 janmiet.
Katkum ka jingiathuh ki briew katei ka thain, kane ka jinghap ka khyndew ka la jia naduh ka por 3 baje mynstep bad la pyntip sha ka tnad PWD Pynursla naduh ka po 7 baje mynstep, ha kaba ki ophisar ki la wan peit ha ka por 9 baje mynstep ban phah pynkhuid ia katei ka twa. Hynrei haduh ka por ba wan poi u Lamphang ha katei ka por, kata ha ka por 1baje duna eiei mynsngi, khlem pat don ba pynkhuid ia ka khyndew.
Katkum ka jingtip, ki enjiniar ki la ai daw ka jingslem ka dei namar ba ym don ka JCB bad hap ban leit wad kaba pyllong ban slem.
U Lamphang uba la iohi ruh ba kawei ka bos saw sorkar kaba kamai ka la sahkut ha katei ka jaka kumba khang lynti ia ki kali ban iaid, u la sngew bitar jur ia kane bad u la phun ia ki ophisar ba ki dei ban leh eiei ia u nongniah bad ia ka bos namar ba ka jinglong khlem akor jongki, ka la ktah iaka leit ka wan jong u paidbah.
Katkum ka jingiathuh ki paidbah, katei ka bos saw ka la tur ban iaid na ka jaka ba lait twa hynrei namar ba ka jem ka khyndew na ka jingkhia jongka, ka la sahkut syndon tden haduh ba kam lah shuh ban khih. Wat ka trok ruh ka la pyrshang tan ia ka, hynrei kam lah bad kane ka la pynsahkut lut ia baroh ki kali rit kiba thmu ban leit sha iew bad kiba leit shwa briew.
Ia ka khyndew kaba hap ha ka surok la lah ban pynkhuid haduh ka por 3.30 baje noshngi.
Kham hadien ba iakren bad ki nongthoh khubor, u Lamphang u Dr Donkupar u la ong ba sngew bitar ia ka jingleh khlem akor jongu nongniah bos khamtam haba u la phet ialade na katei ka jaka haduh ba ki paidbah ki jynjar.
“Lada kam khang lynti kato ka bos saw, ngi la lah ban iaid na ka jaka kaba lait hynrei ka jingtur jongka ban iaid ka la sahkut haduh ba ym lait shuh ki kali paidbah ruh”, la ong u Dr Don.
Haba kylli da kano ka lynti u lah ban poi sha Umniuh, u la ong ba u la hap ban phah leit buh da ka kali paidbah. “Nga la poi sha Umniuh da ka kali paidbah”, la ong u Dr Donkupar.