Shong noh da ka helicopter ban leit sha Dawki, Sohra, ong u myntri jylla

Shillong:U myntri ka tnad jngohkai ka jylla u bah Paul Lyngdoh, ula ong ba katkum ka surbe ne ka jingleh sorjamin ka Sky Scanner ka la lap ba ka nongbah Shillong ka dei kaba khring tam ia ki nongwankai ki briew ka India ha 2025.

Haba kren mynta ka sngi, u bah Paul ula ong ba kane ka dei ka jingjop kaba khraw ia ka jylla Meghalaya bad dang shen, ka sorkar ka la ioh 199 klur tyngka na ka sorkar India na bynta ar tylli ki projek ha ka kam jngohkai.
Mynta u snem, ki don 15 lak ngut tam ki nongwankai kiba wan jngohkai ia ka jylla bad lashem ka jingkiew kan long 60 percent.

Ha kajuh ka por, ula iathuh ba ka sorkar kan pynher liengsuin rit ne helicopter sha Sohra, Dawki, Guwahati sha Umroi, Umiam, bad New Shillong. Ka sorkar ka dang pynkhreh ruh ban tei ia ka Rain Museum ha Mawsynram.

Halor ki tamasa, u bah Paul ula iathuh ba ka jingpyllut ka sorkar ka iapher kawei na kawei pat, namar ba ka rong ka taw ban wan u Bryan Adam, ka dei kaba leh ki kynhun shimet bad ka sorkar ka shu kyrshan, hynrei ka Cherry Blossom la pyniaid hi ka sorkar nadong shadong.