Shong kyrain ki nongtrei casual ka tnad ialehkai, ban pynkiew bai bylla

Shillong, 05 Nailar:
Ki nongtrei ba thung shi por ne casual worker ka tnad ialehkai ka jylla, ki la pynlong ia ka jingiashong kyrain ba saw kynta mynta ka sngi Palei ha madan Basketball ka tnad ialehkai ha Lachum iere Shillong ban dawa pynkiew bai bylla sngi noh ia ki.
Kine ki nongtrei casual ki don kumba 100 ngut eiei kiba trei ha ka tnad ialehkai ban pyn khuid ia ka JN Stadium, Polo bad napdeng jongki, ki don kiba la trei bun snem haduh 15 snem, 9 snem, bad don kiba dang katto katne snem.
Haba iakren bad ki ha kane ka jaka pynlong iashong kyrain, kine ki nongtrei shipor ba hap hapoh ka jingpeit ka State Sports Council, ki la ong ba haduh mynta ki ioh tang T.2 hajar shi bnai kaba dei ka jingsiew kaba rit than bad kam pat kot wat tang ia ka jingsiew ba la buh bylla sngi ka sorkar ruh.
U Bah Sani Marbaniang uwei na ki nongtrei casual kane ka tnad, u la ong ba ia kane ka jingdawa pynkiew bai bylla la pynsngew sha ka sorkar haduh u myntri sorkar tnad ialehkai naduh u snem ba la dep.
“Hadien ba la iakynduh ia u myntri la ar sien, u la kular ba un peit ia kane ka jingeh jong ki hynrei haduh mynta khlem pat leh eiei”, u la ong bad ka jingpynlong ia ka jingshong kyrain ka long shi bynta ban pynsngew sha ki bor ba dei peit ban pynkiew noh ia ka bai bylla.
Hynne ka sngi, ki la iakynduh ruh ia u Director ka tnad ialehkai u Bah FM Dopth ban iakren ia kane hynrei na ka liang jongu, u la ong ba ka shong ha ka Head Assistant bad u Engineer ka State Sports Council ban leh ia kane.
“Ha ka por ba iakynduh bad u myntri kham mynshwa, u la kular ban pynkiew ia ka bai bylla sha ka T.160 shi sngi katkum ka dor ba la buh da ka sorkar jylla bad un leh hadien ba la dep ka dorbar mang tyngka hynrei haduh mynta khlem leh eiei”, la ong iwei I kong.
“Jin lada ngin ioh ia ka jingsiew kaba T. 160 shi sngi kan long kumba T. 4800 shi bnai bad ka la kham iarap ia ngi ha kane ka pyrthei rem”, I la bynrap.
 Haba pyrshang ban leit iakynduh ia u engineer ka State Sports Council, u Bah G Khawmawphlang, um shym la don ha ophis.