Shong kyrain khlem buh por sa ka KHNAM

Shillong, 19 Jymmang:
Ban kyrshan ia ka jingiakhih shah thngan u Working President u Bah Adelbert Nongrum, ka KHNAM ka la rai ban pynlong ia ka jingshong kyrain kaba sdang naduh mynta ka sngi Hatmajai.
Kane ka jingshong kyrain la pynlong ha kajuh ka jaka ba u Bah Nongrum bad u samla Goldy Warjri ki iashong shah thngan khlem buh por.
Haba kren sha ki nongthoh khubor mynta ka sngi, u MDC ka KHNAM u Bah James Ban Basaiawmoit u la ong ba ka KHNAM ka la rai ban iashong kyrain khlem buh por ban pynbor ia ka sorkar ba ka dei ban pdiang noh ia ka Village Administration Bill khlem pynslem shuh.
“Ngi la rai ban pynlong ia ka jingshong kyrain khlem buh por ha kane ka jaka ba pynlong shah thngan u Bah Nongrum bad u samla Warjri”, la ong u Bah Basaiawmoit bad bynrap ba la kyrpad bad kyntu ia baroh ki paidbah ka ri Khasi bad Jaintia ba kin wan iasnohkti lang namar ba kane kam dei ka kam tang jong ka KHNAM hynrei jong ka jaitbynriew baroh.
U la pynpaw ia ka jingsngew lyngngoh ia ka jingsngap mynthi ka sorkar jylla ban khlem jubab wat hadien saw sngi ba u CEM barim bad u samla Warjri ki la pynlong ia ka jingshah thngan.
“Ka sorkar ka sngap mynthi haduh mynta, kam kren eiei halor kane ka jingiakhih bad ngi la rai ban pynjur da kaba shong kyrain lang baroh khlem buh pud naduh mynta ka sngi”, la ong u bah Basaiawmoit.
U la ong ba la khot bad iawer ia baroh ki rangbah shnong, ki seng sain pyrthei bad ki paidbah ba kin wan ban iasnohkti lang ha kane ka jingiakhih shong kyrain. “Ngi ieng beit tang ha kawei ka lama jong ka jaitbynriew khlem peit party, peit seng”, la ong shuh shuh u MDC ka KHNAM.
Katba u Bah Latiplang Kharkongor u la ong ba ka jingiakhih kam dei iano iano hynrei ia ka jaitbynriew bad ka lawei jongka. “Ngi kyrpad ia ki paidbah ban wan iasnoh ia kane ka jingiakhih na ka bynta ka jaitbynriew”, la ong u Bah Kharkongor.
Halor ka jingslem ban pdiang ia ka VAB da ka sorkar kaba ong ba don ki bynta ba iatyngkhuh bad ka phang jong ka sorkar bad ka sorkar pdeng, u Bah Kharkongor u la ong ba ka KHADC ka la shna ia ka VAB katkum ki kyndon ka 6th Scheduled bad kam iaid palat ia kata. “Lada don ki jingduna lah ban pyndap bad ia ki jingduna lah ban pyndap. Lada ia ka riti synshar ka ri India la pynkylla shipah sien, kaei ka jingeh ia ka VAB”, la ong u Bah Kharkongor.