Shong kyrain ka UDP, dawa hiar shuki ia u myntri bording

Shillong, 29 Iaiong:
Ka UDP mynta ka sngi ka la pynlong ia ka jingshong kyrain ha khmat Additional Secretariat ban pynpaw pyrshah ia ka jing bym lah ka sorkar ban ai bording tikna sha ki paidbah.
Ki dkhot ka UDP kynthup ki MLA, MDC bad ki nongkitkam jong ka ki la pynlong ka jingshong kyrain bad ki la dawa lai tylli ki mat na ka sorkar ba kan leh noh mardor.
Kine ki long ban pynbiang bording ba thikna sha ki paidbah khlem pynlip shuh, ban pynlong ia ka jingtohkit ia baroh ki projek bording kiba don ha ka jylla ba la aiti ha ki kompeni bad ban hiar shuki noh u Myntri kam bording u Clement R Marak kum ka jingkitkhlieh ba um lah ban bat ia la ka tnad. “Lada ka sorkar kam sngap ia kine ki jingdawa, ngin sa shong ha ka party ban iaid shakhmat da kiwei ki lynti jam”, la ong u U Working President ka UDP u Bah Jemino Mawthoh ba dei u MLA ka Nongthymmai.
U la takrain tyngeh ia ka sorkar ka bym iohi jngai haduh ba ka jylla kan iakynduh ia kine ki jingeh kumba long mynta.
“Ki paidbah ka jylla ki kohnguh katba ong ka sorkar, lada ki pynkiew bill ruh ki siew beit hynrei ki la buh ka jingkylli balei ia ka bording pat kim ioh tikna”, la ong u Bah Mawthoh.
U la ong ba bun ki projek bording ba ka sorkar ka la aiti sha ki kompeni hynrei haduh mynta kim tip ki la long kumno. U la ai nuksa ka Myntdu-Leska Hydel Power Project ka la bam hati kit kulai namar ba na ka jingmang pisa kaba T.300 klur hynrei mynta ka kiew shaduh ka T.1300 klur katba ia ka bording pat khlem pat ioh eiei.
“Ngi dawa na ka sorkar ba ka dei ban ai ia ka White paper jong baroh ki projek bording ba la ai ba pyntrei da ki kompeni ha kane ka jylla, la ong u Bah Mawthoh bad bynrap,ba ka jingtohkit ka dei ban aiti sha ka CBI.
U la ong ba kane ka jingiakynduh jingeh jong ki paidbah ban nym ioh bording haduh 11 kynta ha ka shisngi ka dei ka jingjia kaba nyngkong eh ha kane ka jylla. Kane baroh ka jia namar ba ka sorkar kam shym la iohi jngai ban pyrkhat ia ka lawei.
Ha kane ka jingiashong kyrain ki MLA kiba la wan ban iashim bynta ki long u Bah Jemino Mawthoh, Bah Titosswell Chyne, Bah Embhahlang Syiemlieh nalor ki MDC kynthup u Bah Teinwell Dkhar, Bah Hadrian Lyngdoh bad ki nongkitkam ka party.
La pynlong ia ka jingshong kyrain ryngkat ki jingthoh pyrshah ia ka sorkar halor ka jingpynlip bording bad ruh ka jingtem bom da ka jingpyrta artad pyrshah ia u Mukul Sangma bad ia ka sorkar.