Shong kyllaiñ myngngor ki nongtrei Bank Nongkyndong bym urlong ki jingdawa

Shillong, 11 Nohprah:
Ki nongtrei ka bank nongkyndong mynta ka sngi ki la sdang ia ka jingiakhih jong ki da kaba shong kyllaiñ myngngor hakhmat ka ophis bah jong katei ka bank kaba don ha Khyndailad, katei ka jingshong kyllaiñ myngngor jong ki ka dei ban pyrshah halor ka jingbym don ba shimkhia ban pynurlong ia ki jingdawa jong ki haduh kine ki sngi ruh.
Kitei ki nongtrei ka bank nongkyndong ki la sdang ia ka jingiakhih jong ki hapoh ka lama jong ka All India Regional Rural Bank Employees Association, National Federation of RRB Officers bad National Federation of RRB Employees, Joint Council of Meghalaya Rural Bank Unions. Katei ka jing iakhih jong ki ka dei ruh ban kyrshan ia ki rai jong ka jingialang ki nongtrei ka bank nongkyndsong kaba la long dang shen ha in Punjab kiba la rai ban bteng ia ka jingiakhih haduh ba ka jingdawa jong ki kan urlong.
Nalor katei ka jingshong kyllain myngngor mynta ka sngi ha khmat ophis ka RRB, ka seng ki nongtrei ban k nongkyndong ki la rai ruh ban bteng ia ka jingiakhih jong ki da kaba leit shong kyllaiñ ha khmat ophis ka NABARD Regional Office, Guwahati ha ka 18 tarik u nohprah. “Katei ka jingbym lah ka sorkar India ban pyntreikam ia ki jingdawa jong ngi kan pynbor ruh ia ngi ba leit ia khih ha Jantar Mantar, New Delhi ha ka por ba kan long ka dorbar mang tyngka ka ing dorbar bah ka ri ka Parliament , bad lada donkam ngin sangeh trei ruh tang mar ia kut u rymphang la shem snem” ong u general secretary ka Meghalaya rural Bank Employees’ Association u P Choudhury.
Lah ban kdew ba ki nongtrei ka bank nongkyndong ki la dawa ban pynkhlain ia ka rukom treikam katei ka bank da kaba weng noh ia ka RRs Act Amendment Bill, 2015 na ki jylla kiba hap hapoh ka NRBI bad NABARD, ban pynioh pension ia ki, ban pyntreikam ia ka skhim thungkam sngewlem, ban ithuh noh ia ki nongtrei Part time, ki nongtrei bylla sngi, ki Casual bad ki ba trei da ka kontrak hapoh katei ka bank, ki la dawa ruh ban pyllait ia ki jingmyntoi ba kidei ban ioh nalor ka tulop ba kynthup ia ka Trade Union rights, ban pynduh ia ka ripod ka komiti SK Mitra, ban pynkiew kyrdan na ka Scale IV sha ka Scale V bad kiwei. Kitei ki nongtrei bank ki la rai ruh ba kin bteng ia ka jingiakhih jong ki tad haduh ba ki jingdawa jong ki kan da urlong.