Shong khlem kam, ka Sohra

Shillong,28 Jymmang:
Naduh ba la sdang ban pyntreikam ia ka hukum ban khang tih dewiong, ki paidbah ka thain Sohra khamtam na ki thain Laitryngew –Mawlong -Wahlong bad kiwei pat ki shnong ki la shong khlem kam khlem jam, bad kane ka la ktah bha ia ka longing longsem jong ki naba ki la ia kynduh jingeh ban pyndap pynbiang ia ki jingdonkam ha ing ha sem.
Ki nongshong shnong jong ka Sohra haba ia kren bad u nongthohkhubor ha kine ki khyndiat ba la dep ki la iathuh ba naduh ba ki pulit ki la pyntreikam ia katei ka hukum ka National Green Tribunal, ki pulhit ki la wan ban khynra ha ki par dewiong ruh, bad uwei u rangbah u la iathuh ba kim shah tang ban khang tala ia ki tiar ki tar ba ki treikam ruh kiba ki la buh ha ki sem rit jong ki ha par dewiong bad la beh ia ki na katei ka jaka.
Na ka liang u MLA ka Sohra u bah Titos Chyne u la pynpaw ka jingsngewkhia halor katei ka jingiakynduh jingeh ki paidbah kiba im sngi na ka trei dewiong bad na ka liang jong u- u la kyrpad ia ki bor sorkar ba kin shimkhia, halor katei ka kam khnang ba ki paidbah kin lah ban bteng biang ia ka kam ba ki ju trei manla ka sngi.
Halor katei ka phang u MLA u la ong ba ka jingtih dewiong ha thain Sohra ka dei kaba la sdang naduh ka snem 1942, bad ia ka dewiong na katei ka thain la phah sha ka karkhana pynmih dewbilat ka MCCL, bad sha ki pajwa thang mawshun ha Sohra hi, u la ong ba kam don jingktah ia ka mariang lane ki umbam um dih ha thain sohra, namarba ka sohra kam dei ruh ka thain kaba bit na bynta ka rep ka riang ( agricultural area). U la pynkynmaw ruh ba ha Sohra ym ju shah ban tih dewiong ha ki Law adong.
Lah ban pynkynmaw ba ha ka 30 tarik kan long ka jingialang bah jong ki paidbah ka thain Sohra ha Laitryngew ban ia kren halor katei ka phang ha kaba kan don ruh ka jingrah lama iong kum ka dak ka jingpyrshah ia katei ka rai.