Shillong: Mynta ka sngi, la pynlong ia ka jingialang jong ki Deputy Commissioner lem bad ki Superintendent of Polie jong ka Ri Bhoi District lem bad ka West Karbi Anglong District, West Jaintia Hills na ka bynta ban iakren ia u pud u sam ha Block I & Block II. La pynlong ia katei ka jingialang ha Circuit House, Nongpoh.
Ka kong RM Kurbah DC Ri Bhoi District lem bad ki bor District na Assam ha ka jingialang ha Nongpoh.
Kat haduh ba thoh ia kane ka khubor, la iathuh ba katei ka jingialang jong ki bor District, ka la wai bad ka dang shu sdang pat mynta sa ka jingialang, kaba ar, ha kaba la wan ia shim bynta da ki MLA, ha kaba U bah George B Lyngdoh, u wan shim bynta na ka liang jong ki MLA Ri Bhoi bad na ka liang ka Khasi District Council, la wan shim bynta da U Bah James Sylliang bad U bah Latiplang Kharkongngor, kiba dei ruh ki Executive Member jong ka KHADC. La iathuh ba na ka liang jong ka Assam, la wan mihkhmat da U Dr Mansingh Rongpi, uba dei U MLA ka BJP na Baithalangso Constituency bad nangta sa U Executive Member jong ka Karbi Anglong District Council.
Kat haduh mynta, ym pat shym la ioh satia ia kano kano ka rai, kaba mih na katei ka jingiakren, hynrei la iathuh ba ki bor District na Ri Bhoi, na West Jaintia bad na Karbi Anglong, ha ryngkat ki MLA, kin sa kren hadien ba la wai kitei ki jingialang baroh ar tylli.
