“Shong ha ka sorkar jylla ban rung Khasi ha 8th Scheduled”

Shillong,
10 Rymphang:
U President ka Sahitya Academy u Dr Vishwanath Prasad Tiwariu la ong ba ka jingpynrung ia ka ktien Khasi ha ka 8th Scheduled ka riti synshar ka ri ka shong ha ka jingkitkhia ka sorkar jylla.
“Ka sorkar jylla ka dei ban buddien bad ka sorkar pdeng ban dawa pynrung ia ka ktien Khasi ha ka 8th Scheduled ka riti synshar”, la ong u Tiwari haba kren mynta ka sngi sha ki nongthoh khubor ha ka nongbah Shillong.
U la ong ba ki MLA ka jylla ki dei ban iasnoh kti lang bad ka sorkar jylla ba kan pynlong ia ka jingdawa kaba heh bad kaba tyngeh sha ka sorkar pdeng.
“Ka long kaba donkam ba baroh kin shim khia ia kane, khnang ba ka sorkar pdeng kan shah shkor ia kane”, la ong u Dr Tiwari.
U president ka Sahitya Academy u la ong ba namar ba ki jylla na kane ka thain dong mihngi ki ioh bha ia ka jingshah shkor ka sorkar pdeng lada ki shim khia.
“Ka dei ka sorkar pdeng kaban shim ia ka rai kaba khadduh halor kane”, u la ong.
Shwa ia kane, u dkhot ka Sahitya Akademi u Dr Sylvanus Lamare u la ong ba ka jingiakhih paidbah ka donkam palat ha kane ka por na ka bynta ban pynrung ia ka ktien Khasi ha ka 8th Scheduled ka riti synshar ka ri.
U Dr Lamare uba dei u Principal ka St. Edmund’s College bad u nongthoh Khasi ba paw, u la ong ba ka jingiakhih paidbah kynthup naduh ki samla pule, ki sengbhalang, ki Balang ka donkam ban pynlong ia kane ka kam ban urlong.
“Ka donkam ruh ia ka jingpynshai paidbah shaphang ka jingdonkam jong ka ktien Khasi ba kan ioh rung ha ka 8th Scheduled ka riti synshar ka ri hynrei kaba kham donkam ka dei ka jingiakhih paidbah ban iashim bynta da baroh”, la ong u Dr Lamare.
U la ong ruh ba ka ktien Khasi ka dei ka ktien jong ki Balang bad ka jingiarap bad ka jingkyrshan jong ki Balang ka long kaba donkam bha ha kane ka por. U la ong ba ka ktien Khasi ka biang lut nadong shadong na ka bynta ban ioh rung ha ka 8th Scheduled ka riti synshar ka ri.
U Dr Lamare uba dei u dkhot ka komiti ba la thung da ka sorkar jylla, u la ong kane ka jingiakyrshan paidbah ka donkam ban pynkhlain ruh ia ka jingdawa ka komiti jong ka sorkar jylla ban tynruh sha ka sorkar pdeng.