Shon dur Selfie U Sohan, mar sien dep ia khun bad ki pulit

Shillong, 27 Nailur:
Sa shisien biang u Commander In Chief ka GNLA, U Sohan D Shira u la lait na kti ki pulit bad tang mar ia lait phet na katei ka jaka hadien kumba ar kynta eiei u la shon dur Selfie ialade bad u la buh ha Facebook. Ha katei ka dur la iohi ia ki nongbud jong u kiba bud nadien jong u kiba don kumba 15 ngut eiei ba ki dang kam ia kawei ka wah. Katei ka jinglait phet biang u Sohan ka dei hadien ka jingiakhun bad ki pulit mynta ka step kaba la neh kumba 20 minit eiei.
Ki pulit ki la ioh jingtip ba ki don ki dkhot ka GNLA kiba rieh tngen hajan ka shnong Jakopgre kaba hap hapoh williamnagar PS ha East Garo Hills bad ki suba jur ba ha katei ka ktem u nongialam rangbah jong ki u Sohan u don lang. Dei ha ka por 6:30 baje mynstep ba ki pulit ki la tur sha katei ka ktem ka GNLA bad hangtei ka la mih ka jingiather kuli kaba la kham neh slem.
Watla kam shym la don kano kano ka jingia iap na baroh arliang hynrei ki pulit ki la suba jur ba don ki dkhot ka GNLA kiba la mynsaw jur namarba ki la lap ba ki don ki dak snam ha katei ka jaka. Na katei ka jaka ia siat ki pulit ki la ioh kurup kawei ka suloi Carbine ( Chinese) kaba ia syriem kum ka Uzi, 75 tylli ki detonators, cordex wire, RC circuits, bad kikot ki sla ka GNLA. Ki pulit ki la iathuh ba ki GNLA ki la phet krad sha khlaw ha ki thaiñ ka Jakopgre bad Khakwagre.