Nongpoh: Ka jinghap slap kaba tang katto katne por, hynrei ka jingshlei um ha kawei ka jaka kaba don hajan jong ka Weigh Bridge ha Umling, ka la wanrah jingeh shikatdei eh ia ki nongiaid nongieng hapoh ka surok NH-6 ha Ri Bhoi District.
Na ka jinglap da u Nongthohkhubor bad ruh haba ioh ban iakren bad ki katto katne ngut ki briew kiba don hajan katei ka jaka, ki la iathuh ba katei ka jaka kam dei kaba shel um ha kine ki snem kiba la leit noh baroh, hynrei katei ka jingshlei um ka jia tang mynta u Snem, kata hadien ba la buh ia ka Weigh Bridge ha Umling.
Halor katei ka jingslei um bad kaba la wanrah jingeh ia ki nongleit nongwan kiba iaid lyngba ka surok bah NH-6, la sngewthuh ba ka nongrim kaba la pynlong ia katei ka jingshlei Um ka dei namar ka jingbym biang ki nala pyniaid um bad kaba la pynsuba ruh ba dei namar ka jingtrei torti bad khlem da pynbiang ia ki nala pyniaid um hapoh katei ka Weigh Bridge kaba don ha katei ka jaka.
Na ka jingther u slap ha kine ki khyndiat sngi bad watla ka long tang khyndiat por, hynrei la iai iohi ba katei ka jaka ka la dap, ha kaba ym tang ba ka la wanrah jingeh ia ki nongleit nongwan, hynrei ka wanrah ruh ia ka jingma jingmynsaw bad ka ban sa poi sha u pud jong ka jingjia ba sngewsih, namar bun na ki kali haba ki la poi ha katei ka jaka, ki hap ban phaidien biang bad ruh ban iaid noh na ka liang bym dei (Wrong Side).
Namarkata, katkum kaba la sakhi na ka jingiai jia ka jingshlei um ha katei ka jaka, ka la dei ka por ia ka sorkar ba kan tuklar noh mardor, khnang ban lait na kino kino ki jingjia aksiden bad ki ban sa wanrah ia ki jingsngewsih.
Phi don ban ong eiei?