Shiteng synnia shlei ka Khyndai Lad ha u snem thymmai

Shillong, 4 K’Lyngkot:
Ka Khyndai Lad ka la shlei smam ha ka miet shiteng synia ka 31 tarik Nohprah 2014 bad 1 tarik Kyllalyngkot 2015 kiba pdiang sngewbha ia u snem thymmai ba la pynlong da ka sorkar jylla ban kyntiew ia ka kam jngohkai pyrthei ha kane ka jylla. Ki paidbah ka Nongbah Shillong ki la lum lang khrui ryngkat ka put ka tem bad ki sur jingrwai ban pdiang sngewbha da ka jingkmen ia u Snem Thymmai.
Ha katei ka tamasa lehkmen ba la tip kum ka Shillong Midnight Fest la wan ban pynshongshit da kumba 8 hajar ngut ei ei ki paidbah na ki jaidbynriew bapher bapher kiba snohkti lang ryngkat ka jingpynbyrngia da ki kynhun tem kum ka Kubikles, Dosser’s Urge bad ka Fourth Element kynthup lang ruh ia ki kynhun tem tynrai kum ka Snap Paka bad kiwei kiwei.
Ka thong jong ka sorkar lyngba ka tnad Arts and Culture da kaba pynlong ia kum kitei ki rynsan ka long ban wanrah ka jingiajan, ka jingiasuk ka jingiatylli bad ruh ban pynphriang ia ka khubor ban pynlong ia ka Meghalaya ka Jylla kaba khuid bad kaba jyrngam ha une u 2015.