Shiteng synia ruh wad pisa na synduk ATM

Shillong, 15 Naiwieng:
Ka pisa ka tyngka, ka pynlynga, bad kane ka jia ia ki paidbah ka sor Shillong kiba hap ban shang kylleng ka nongbah ban leit wad pisa na synduk ATM wat haduh shiteng miet.
U nongthoh khubor u la iohi da la ki jong ki khmat ia ki paidbah ba wad pisa na ki ATM na kawei ka jaka sha kawei pat haduh shiteng miet ruh kim khein shuh. Ym tang kiba mareh na kawei ka jaka sha kawei pat shimiet, hynrei ki hap ban ieng lain uba jrong bha ban ioh sei pisa na synduk ATM ha kylleng ka nongbah Shillong.
Ha ka jingiakren bad ki katto katne ki briew ha kane ka miet sngi Hatmajai, ki la iathuh ba ki hap ban mareh na kawei ka ATM sha kawei pat namar ba don ki jaka ba u lain u dang jrong hynrei ka pisa ka la lut noh. Ka jingieng kaba khampher tam namar ba ki paidbah kim khein shuh wat ki kynthei ruh ki ieng lain shaid ha ka por mynmiet ban poi sha ka syndon ATM.
Ha ka ATM kaba don ha Mission Compound, Mawkhar bad ha ka thain Jaiaw, Khyndai Lad, la iohi ba ki briew ki ieng lain haduh 12 baje ruh ym pat kut bad bun kiba hap ban leit phai iing noh tang namar ba ka synduk pisa ka ATM ka la lut pisa noh khait bad mynsngi ki jingkhang ATM ki khang kdam kdam bad don kiba plie hynrei ki thylli khlem don pisa.
Bun kiba la iakren danda ba ka surgical strike ne ka jingkyndang pisa tuh -pisa thok jong u Myntri Rangbahduh ka ri u Narendra Modi ka la long kaba shyrkhei bha namar ba wat shiteng synia ruh ki briew ki hap ban ieng lain ban leit sei pisa bad ka long ruh ka khana kaba khampher tam naduh ba ka ri India ka la ioh ia ka jinglaitluit.
Hynrei kum kane ka jingiamareh ban leit wad pisa kam jia tang ha kane ka nongbah hynrei la iohi ba sha kiwei ki jaka jong ka ri ruh ka jia kumjuh.
Ka iew iadie iathied ruh ka la iakynduh jingeh namar ba ki nongdie ki ud bym don khutia lada ai da ki kot heh T. 2000 kaba thymmai, ka jingbor jingthied jong ki briew ruh ka duna namar ba ki bank kim pat ailad ban sei bun pisa.
Watla ka sorkar pdeng ka la kren skhem ba ki paidbah kim dei ban khuslai namar ba ka pisa kam duna hynrei haduh mynta kam pat poi pahuh satia namar ba ki paidbah kiba leit ieng lain mynsngi ha ki synduk ATM, ki hap ban mih thylli namar ba kim don pisa shuh.
U myntri rangbahduh ka ri u Modi u la pynbna kynsan ha ka 8 tarik Naiwieng ba ki lut pisa T. 1000 bad T. 500 kim iaid kam shuh bad baroh dei ban leit bujli noh sha bank.
Kane ka sienjam ba la leh u Modi, ka long ba u ong, ban tehlakam ia ka jingkynrei ki pisa thok, ki nongbuh pisa tuh bym hok kaba ktah ia ki paidbah.
U la ai lad ia ki paidbah ban pyndep ia ka jingbubli pisa haduh ka 30 tarik Nohprah bad hadien kaneka sorkar kan sa pynbna da kumwei pat.