Shispah snem ka Robert Hospital: Ka jingshakri ba kordor ia ki paidbah

Kyrsoibor Pyrtuh

Ka jingїaseng plie ia ka Welsh Mission Hospital ha ka 25 Lber 1922 ka la sdang da ka jingrwai shaphang ka jingpynkhiah bad jingkyrmen- “A Blei ba pynjanai lyngba ki jingpang…ha ki kynta jong ki jingpang, jingsngewsih bad jingtyrha. Mem ju kyntait ia kiba pang ba jhia.” U Lum Ceredig ha Jaїaw u shlei bad sawa jam da ki sur bathiang jong ka choir ki khynnah skul hapoh ka jingїalam jong i Miss A.W Thomas. Ka jingplie ia ka Hospital ka long kaba phuh ha kaba naduh ki Hindu, Mohommedan, ki Khasi, ki Dohlieh bad kiwei ki la pyndap ia u lum bad madan.”

La tip paidbah ia ka Welsh Mission Hospital ha Jaїaw da ka Roberts Hospital bad kane ka Hospital ka la kynjoh mynta 100 snem ka jingshakri ia ki paidbah. Ki paw ha ki jingthoh ba ka Maharani jong ka Hima Gwalior bad ki trai kper slasha ki ju wan shah sumar ha kane ka Hospital bad ia ka Arundhati Roy, ka nongthoh ia ka kot ba paw nam, God of Small Things, ruh la kha hangne. Pynban ka khanatang shaphang ka Roberts Hospital kam dei eh ka jingwan shah sumar ka Maharani lymne ki trai kper slasha lymne ba la kha ia ka nongthoh kot ba paw nam. Ka khanatang shaphang ka Hospital ka dei ka jingshakri bad jinglen lade jong ki nongtrei na ka bynta ka koit ka khiah jong ki nongshong shnong, khamtam eh na ka bynta ki duk ki suk bad ki rangli. Ngi kit ram shi katdei na ki nongtrei jong ka Hospital bad baroh kito kiba la shakri ia ki para briew ha ka Hospital ha kine ki 100 snem.

Ka mission jingpynkhiah jong ka Welsh Presbyterian ha ka Ri Khasi ka la sdang naduh ka por jong u Dr Owen Richards, uba long u missionary doctor ba nyngkong (1843-44). Hynrei, ki kam jingpynkhiah jong ka Balang Presbyterian ki la sdang thikna naduh ba poi u Dr Griffiths Griffiths ha ka snem 1878-79 haba u la plie ia ki ar tylli ki jaka ai dawai ha Mawphlang bad Laitlyngkot bad ha kajuh ka por u la hikai ia ki trai ri halor ki kam ai dawai.
Ym lah ban len ba ki heh sorkar bad ki heh jong ka Welsh Mission ha Ri Khasi ki la pynduh mynsiem ia u Dr H. Gordon Roberts halor ka jingseng ia ka Hospital. Ki la ong ba ka Hospital ka dei tang ka jingpynlut phut bad yn ym don ki jingsumar kiba heh kiba donkam ban sumar hapoh Hospital. Kumba long ha ki phew snem kiba la lah ha kaba ki Khasi kim pat pdiang ia ka sumar pang kaba thymmai lyngba ki dawai-dashin, kumta ki briew kim pat mon satia ban leit shah sumar ha Hospital. Kane ka long ka jingeh ba ka Hospital ka їakynduh ha kaba sdang bad u Dr Roberts ruh u kubur ia kane ha ka jingkren jong u ha ka jingїalang jong ka British Assam Medical Mission, Assam Branch ha ka snem 1926. Hynrei ha kane ka jingїalang u Dr Roberts u la ban jur halor ka jingdonkam jong ka jingsumar pang ha Hospital khnang ban wanrah ia ka jingkoit jingkhiah bad ka sumar pang kaba paka. U Dr S. P. Sen Gupta u ong ba u Dr Roberts u kham mon ba ki briew kin shah sumar ha Hospital khnang ban їoh ka jingkoit kaba pura. Ha kaba kut hi u Dr Roberts u la lah ban pynkohnguh ia ki nongpynїaid ka Welsh Mission.

Da ka pisa kaba tam na ka fund ai jingїarap ia ki lanot ha ka jingkhynῆiuh jumai ha Ri Khasi ha ka snem 1897, u Dr Roberts u la sdang ban tei ia ka Hospital ha Jaїaw ha ka snem 1917. Hadien kata u la leit shuti sha Bilat bad u la pan jingbit ban lum pisa na ka bynta ka Hospital. Ka mission jong u ban tei Hospital ka la khring ia kiba bun ki briew ha Ri Wales bad ki paidbah ki la noh synῆiang kylluid bad la lah ban lum haduh lai phew hajar pound (£ 30,000.00).

Naduh ki snem kiba nyngkong jong ka spah snem ba ar phew ki Khasi ki la pynpaw ia ka jingtbit jong ki ha ki kam bapher. Katkum u Dr R Arthur Hughes, “u Dr Roberts u don ki nongtrei Khasi kiba tbit bad kiba don ka sap kaba kyrpang ha ki kam engineering. Ki long kiba shemphang bad ki lah ban pyndait ia ki tiar ki tar naduh ka X-ray, ka boiler bad kiwei ki kor…ki dei ki riewdonsap kiba lah ban jop pyrthei” Naduh ka snem 1924 ki la don ruh ki samla kynthei kiba la rung sha ka jingpule nurse, kiba kynthup ia i Lesibon, Derila Paley, Estella Nongsteng bad Ilwelibon Tiewtaby kiba angnud ban shakri ha ka Hospital. Kumjuh ruh i Dr Drin Singh Hynῆiewta i la shakri kum u doctor ha Roberts Hospital naduh ka snem 1928.
Ňiuma, ym shem ban don ki rai ha ki bui jong ka Balang Presbyterian na ka bynta ban tei ia ka Hospital ha Shillong. Hynrei ha ka Assembly kaba la ong ha Mawkhar Presbyterian Church ha u Lber 1923, “la iakut ba ki Presbytery kin kynshew pisa na ka bynta ki Hospital Mission; ia kane yn pyrkhat da ka Committee”. Ka Mawphlang-Khadsawphra Presbytery ka dei ka Presbytery kaba nyngkong ban jubab halor kane ka jingkyrpad na ka bynta ki Hospital bad ha ka Dorbar Presbytery kaba la long ha ka Balang Mawthawpdah ha u Їaїong 1923 la їakut – “Shaphang ban pynlong jingkynshew na ka bynta ka Hospital u Dr Roberts ha Jaїaw. La iakut ba dei ban kynshew noh naduh mynta hi ka snem; ia ki lad kumno yn kynshew, la aiti sha ki circle bad Sub-District ban pyrkhat.” Kumjuh, ha ka Assembly kaba la long ha Sohra ha ka snem 1925 la iakut, “Ba na ka bynta kiwei pat ki jingdonkam ha ki Aspata (Jaїaw bad Jowai) la iakut ba ki Balang ha ka Ri baroh kawei (Khasi-Jaiῆtia) kin pynlong ka Hospital Sunday man la ka snem, kata ka mut kawei ka sngi u Blei ban kren ne duai bad ban pynlong jingkynshew khnang na ka bynta ki Aspata. Ki presbiteri kin pynthikna la ki jong ki por ban kynshew.”

Ki rai kiba la shim ha ki Dorbar Assembly jong ka Balang Presbyterian ha Ri Khasi-Jaiῆtia ha ki snem 1923 bad 1925 ki long kiba kongsan. Ki pynpaw ba ka Assembly hi baroh kawei ka kyrshan ia ka Hospital bad ki dkhot ka Balang ki їashim bynta ha ka mission jingpynkhiah jong u Dr Roberts. Ki rai ki shat phalang ruh ia ka nongrim tynrai jong ka Balang ban kyrshan bad synshar hi. Kumta 100 snem mynta ki dkhot ka Balang bad kiwei ki nongshong shnong ki la noh synῆiang shikatdei sha ka Hospital lyngba ki jingkynshew bad jingai sngewbha, nalor ka jingshakri da ka met kum ki nongtrei jong ka.

Ha shuwa ba ka kynhun ba khatduh jong ki missionary kin leit phai jynduh sha la ka Ri ha ka snem 1969, la pynbeit bad aiti ia ka jingpynїaid ia ka Hospital ha ki trai Ri bad la thung ia i Dr E.C Syngkon kum u Senior Medical Officer bad ia u Dr S. P. Sen Gupta kum u Chief Medical Officer. Ha ka Dorbar Synod kaba la long ha Balang Parїong ha u Lber 1969, u Dr R. Arthur Hughes u la pule ha ka sien kaba khatduh ia ka Report jong ka Hospital bad u la ong, “ki snem kiba dap da ki jingpynkylla suda na ka liang ka jingsynshar, ka jingtip shaphang ki dawai dashin, ki jingpang bad ki lad jingpynkoit. Ngi la iohi ia ki jingpynkylla khongpong ha ki jingkhmih lynti jong ngi shaphang ka jingkoit jingkhiah. La ju don ki jingpang kiba ka bor ban pyniap ka la long kaba khraw…haduh khyndai na ki shiphew ngut ki nongpang ki ju iap bad na kito kiba sah ruh don kiba kylla pang iap shilliang ne kiba bieit, hynrei mynta ngi lah ban khmih lynti haba lap kham kloi ia ka jingpang bad khyndai na ka shiphew ngut ki nongpang kin im…” Mynshuwa ia ka jingpang bad jingїap ngi pdiang ba ka long ka mon jong u Blei, hynrei mynta ngi phla shynna da ka jngngeit ba ka jingpynkoit ruh ka dei ka mon ba phylla jong u Blei.

Na ka bynta ka lawei jong ka Hospital, U Dr R. Arthur Hughes u la shaniah tylli tyllan ha ka bor, ka sap bad ka jingstad jong ki Doctor trai ri kiba tbit kum i Dr Romily Basaїawmoit, Dr Jerisim Dkhar, Dr Frank Niangti, Dr S.S Sharma. U la ban ruh ba ka jingstad kaba thymmai ha ka rukom ban sumar ia kiba kha khyllung kaba u Dr E.C Syngkon u la wanrah, ka jingshemphang bad jingtbit jong i Dr Orientcey Roy ki long ka jingkyrkhu bad kin kyntiew ia ka Hospital sha ki kyrdan kiba khraw.
Ha ka snem 1972, ka budget jong ka Roberts Hospital ka long kumba 10,62,000.00 tyngka bad ha ka jingrakhe ia ka jingdap san phew snem la plie ia ka Children’s Ward bad Out-patient Department. La pynkhreh ruh ia ka plan ban tei thymmai ia ka Operation Theatre bad Surgical ward. Ka Roberts Hospital ka la mad ruh ia ki kynrum kynram kiba mih na ka por sha ka por bad ka don shibun bah ki jingdkhoh ha ka rukom pynїaid kam. Ka la mad ia ka jingїakhih jong ki nongtrei bad ka jingmih noh jong ki Doctor na kawei ka por sha kawei pat bad kaba jia khatduh dei ha ki snem 2015-16. Ka jingpyrshang kaba thohmut thohmat bad ka jingsyrdep ia ka jot ka pei kam shym la їarap satia, dei tat haduh ka snem 2016 ba ka KJP Assembly ha ka Special Session kaba la long ha u bnai August ka la thung ia ka Committee Kyrpang na ka bynta ban pynthymmai bad pynkylla ia ka rukom pynїaid kam. Kane ka Committee ka la wad ia ka jingїarap jong ki Expert bad thung ia ka Expert Committee kaba kynthup ia i Dr P. Lyngkhoi, Dr Faith Rangad bad Dr Sunil Kaul bad hadien ka jingpule bad jingjurip bniah kine ki expert ki la ai shibun ki jingtyrwa kiba lah ban pyntreikam na ka bynta ka jingbha bad ka lawei jong ka Hospital.

Ka Roberts Hospital ka dei ban bteng ia ka jingshakri bakhraw jong ka bad khlem artatien ka Hospital kaba la seng nongrim ha ka jingieit bad jinglen lade kan nang lah ban ai ia ka jingshakri ba kordor. Kumjuh ruh, u Dr R. Arthur Hughes ha ka kaiphot kaba u la phah sha ka Balang Kmie ha Wales u la ban jur ba ka Hospital Roberts ka dei ban neh junom. Hapdeng ka jingpyrshang jong ka Sorkar ban thaw ia ki Hospital Paidbah bad ban phah pule doctor ia ki samla, ka Hospital jong ka Balang bad kaba la pynїaid ha ka lyer Khristan jong ka jingieit, ka jinglen lade bad jingїatiplem ka lah ban shakri kham bun shah bad ban їeng-їakhun pyrshah ia ki jingeh bad ki jingpang ba ki briew ki mad bad ban ai ka sumar pang kaba bha tam.
Ka Roberts Hospital ka dei ban їailong ka Hospital jong ki riewpaidbah bad ban ai ka jingshakri ei bad ha ka dor kaba jem khlem da ῆiew shilliang khmat ne thew kyrdan iano iano ruh. U Rev R.R Cunville ha ka jingkyrpad kyrshan pisa ha ka snem 1972 u la ong, “ba ha kane ka Hospital ki don ki nongpang ki bym lah ban siew lut ia ka bai dawai ne bai sumar bad ki don ruh ki bym lah ban siew wat shi pisa.” Khnang ba ka Hospital kan їaineh ha ka jingkhot sha ka jingshakri, ka Balang ka dei ban pynїaid hok, ban synshar khuid bad ai jingkheiῆ.