Shisngi shuwa ka 15tarik, weng noh ia ka jingthmu shah thngan sha KHADC

Shillong,14 Naitung:
Shi sngi shuwa ban kut ka por ba ka Joint Action Committee On Two Lane Road Nong stoiñ-Mawthabah ka la buh ia ka KHADC, ka rai ba katei ka JAC ka la shim ha ka jingialang bah na Nongstoiñ ka la kylla khongpong noh.
Lah ban pynkyn maw ba ka jingialang bah kaba la long ha ka 9 tarik mynta u bnai ha Nong stoiñ ka la shim ia ka rai ban ai por san sngi ia ka KHADC ba ka dei ban mynjur noh bad ban ai NOC na bynta ka surok 2 Lane na Nongstoiñ sha Mawthabah bad katei ka jingialang kaba la mih huri hura ka la rai ruh ba lada jia ba ka KHADC kam sngap kan leit tur paidbah bad kan shong shah thngan ha phyllaw ka KHADC hadien ka 15 tarik mynta u bnai.
Hynrei shuwa ba ka por ba ki la buh kan kut noh artad, katei ka JAC ka la leit ia kynduh ia u Chief Executive Member ka KHADC u bah Pynshngaiñ N Syiem bad hadien ba ki wan ia kynduh ka jingiakren ban shong shah thngan kam shym la mih shuh. Ban pynthikna hato katei ka jingleit kynduh CEM ki nongialam ka JAC ka dei kaba la khot da u CEM ne ka dei ba kishu leit hi dalade, u Rupang u la ioh ban ia kren bad u bah O.Myrthong u Chairman ka Synjuk ki Trai khyndew katei ka thaiñ ha kaba u la ong a ym shym la dei ba khot u CEM hynrei la shim rai ban leit ia kynduh CEM ha ka jingialang kyrkieh ka Executive Committee ka JAC.
Kumba ki nongialam katei ka JAC ki la kren mynta ka sngi sha ki kotkhubor la sngewthuh ba ki la randien noh ia ka rai kaba ki la shim ha ka jingialang bah ha Nongstoiñ hynrei ki la ap ia u CEM bad u bah Hadrian Lyngdoh Chairman ka komiti kyrpang ka KHADC ba kin leit shuwa sha Delhi bad ban ai khubor sha ki hadien ka jingwan Delhi bad kila pynpaw ba lada u CEM um jubab lane um pyntip sha ki kin sa wan ia kynduh biang ia u, bad hangne la sngewthuh ba ka jingbyrngem leit shong shah thngan ka la kut noh.