Shillong, 6 Nohprah:
Ka elekshon MDC shiteng samoi ha Nong-krem konstitwensi ka la shongshit bha, ha kaba tang mynta ka sngi ki la don haduh 4 tylli ki seng saiñpyrthei kiba la pyn-long jingialang paidbah ha Smit bad ki jingialang ki long kiba shongshit ha kaba katba nang ka por ki paidbah ki la nangtuid. Nyngkong la sdang ia ka jingialang da ka deng BJP, bud sa ka KHNAM nangta pat bud ka seng UDP bad khadduh la pynlong sa ka HSPDP.
Na katei ka jingialang kaba la long ha ka sngi iew Smit la ithuh ba khambun na ki paidbah ki la tuid ha ka jingialang ka UDP bad ka HSPDP. Ki nongialam jong kitei ki seng ha ka jingkren paidbah jong ki –ki la pynksan la ki jong ki nia ban pynkohnguh ia u paidbahbah ban thep vote sha ki ha kaba ka seng ka la pyni ia la ka jong ka nongrim bad ka wei ka seng da kumwei pat. Ka seng UDP ka la ther tyngeh ia u nongialam jong ka seng HSPDP u bah Ardent M Basaiawmoit bad ka HSPDP ruh kumjuh ka la ther tyngeh ia u kyrtong katei ka seng u bah HS Shylla.
Lah ban kdew ba don 5 ngut ki kyrtong ki ba ia khun ha katei ka konstitwensi mynta ka elekshon MDc shiteng samoi bad kitei ki kynthup ia u bah Hubert Riang kyrtong ka HSPDP, u bah HS Shylla kyrtong ka UDP, u bah Lambor Nongrum kyrtong ka Congress, u bah Edar Nongbri kyrtong ka KHNAM bad ka kong Mimiry Nongkhlaw ka kyrtong jong ka BJP.
Phi don ban ong eiei?