Shisnem shah kem 218 ngut ki lehnoh ha Jylla

Shillong, 9 Nohprah:
Ki pulit ki la pynmih ia ka ripod ba hapoh kane ka shisnem ki la don haduh 108 ngut ki riew paidbah bad uwei u pulit kiba la shah rahbor ha ki seng lehnoh bapher bapher ha ri lum Garo, bad ki la ong ba ki kem haduh 218 ngut ki dkhot jong ki seng lehnoh bapher bapher kiba treikam ha kane ka jylla na ki 301 tylli ki jingleit khynra lehnoh jong ki.
Katkum ka jingai jingkheiñ ki pulit kitei ki 218 ngut ki seng lehnoh ba ki la ioh kem 26 ngut na ki ki dei ki dkhot jong ka GNLA, 36 ngut ki AMEF, 18 ki ASAK, 11 –ki ANLA, 10 ki ANCA, 8 ki LAEF, 5 ki NDFB, 4 – ki UALA , 3 ki ULFA, 3 ki ANVC.B , 3 ki UANF, 1 u GNAF, bad 9 ngut ki dkhot ka HNLC bad nalor kitei ki don ruh sa 45 ngut ki dkhot jong kiwei pat ki seng lehnoh.Katei ka jingioh kem ia ki ,ki pulit ki la ong ba ka sdang naduh ka jingkhynra lehnoh kaba la shim jingkhein naduh ka 1 tarik u kyllalyngkot haduh ka 8 tarik u nohprah,bad ka ripod pulit ka pyni ruh ba 54 ngut ki dkhot lehnoh ki dei kiba la wan pyndem katba 39 ngut pat ki la shah siat iap ha ki pulit.Katei ka ripod pulti ka la pyni ruh ba ki pulit ki la ioh jingjop ha ka jingleit khynra bad pynpra ia ka ktem jong ka AMEF ha Boldra Abri, East Garo Hills bad Daso, West Khasi Hills, ki la pynpra ia ka ktem ba ia sahlang ka GNLA bad ULFA ha Durama Hills kaba don hajan Nokrek , East Garo Hills, ki la pynpra ia ak ktem ka GNLA ha Gonjagre, South Garo Hills, ha ka shnong Patalagre bad Songmagre nalor ka khlaw Duragre East Garo Hills. KI la pyni ruh ba ki la ioh kurup 837 tylli ki kuli, 78 tylli ki tiar ialeh, 2ki hand grenades bad kiwei. Na ki 108 ngut kiba la sha rahbor la pyni ruh ha ka ripod ba 18 ngut kipaidbah ki la shah pyniap, 19 ngut ki la mynsaw, 7 ngut ki pulit ki la shah pyniap ha ka jingleit khynra lehnoh katba 12 pat ki shu mynsaw.