Shisien khniot khnai U Mukul, plie 11tylli ki Bank

Shillong, 20 Nohprah:
U Myntri Rangbah ka jylla u Mukul Sangma u la plie ia ki 11 tylli ki tnad jong ka Meghalaya Rural Bank (MRB) na Convention Centre, Shillong mynta ka sngi Thohdieng. U Myntri Rangbah u la plie ia ki shisien khniot da u khnai ka kompiwtor bad mar ia plie, ki la trei kam lut ha ki jaka ba ki don.
Kine ki 11 tylli ki tnad kane ka bank ba plie hynne ki long ka Laban, Mawiong, Mihmyntdu, Chutwakhu, Nongrah, Zero point, Nondein, Phublari, Garobadha, Mahen draganj bad Mawhati. Da ka jingplie ia kine, ka MRB ka dei ka bank kaba don bun tam ki tnad ha ka jylla ban don haduh 87 tylli.
Haba kren ha kane ka jingplie, u Myntri Rang bah u la ong ba ka kane ka jingjia ban plie haduh 11 tylli ki bank shisien plie na kajuh ka jaka, ka long ka jingjia ba kham pher. “Mar ia klik ia u khnai ka kom pitiwtor, baroh ki tnad ki treikam, nga ai khublei kyrpang ia ka MRB kaba lah ban pyniar ia kane ka jingshakri”, la ong u Mukul.
Ka MRB ka dei ka bank ba biang tam jaka nongkyndong ha India” la ong u Mukul bad bynrap ba ka bank ka la ai ban pyntreikam ia ka credit deposit ratio haduh 44 percent bad ka la buh thong ban pynkiew sha ka 50 percent ha ki snem ban wan.
U la ong ba ka MRB ym tang ba ka shakri ha ki kam ban airam ban thep pisa ia ki paidbah, hynrei ka plie lad ruh ban ai kam ai jam ia ki samla ka jylla. “Kane ka bank ka la poi sha ki jaka bym poi kiwei sha ki jaka ba kyndong tam”, la ong u myntri rangbah.
Ha kawei ka liang, u la kyntu ia ki bor ba dei peit jong ka bank, ba kin iatreilang bad ka sorkar ban shim kabu na ki skhim ba ka sorkar ka la pyntreikam na ka bynta ki paidbah sha ki jaka nongkyndong khamtam na ka skhim Integrated Basin Development and Livelihood Programme (IBDLP).
“Ka bank ka dei ban hikai ban kyrshan ia ki nongrep ha ki nongkyndong ba kin lah ban kiew ha ka kamai kajih ka ioh ka kot jongki”, la ong u Mukul.
Ha kane ka sngi, la ioh ruh ia ka jingkren na u chairman ka MRB u Mukul Ch Jeishi, na ki nongmihkhmat na SBI, Guwahati, RBI, bad kiwei de.
La sam ruh ia ki khusnam sha ki tnad jong kane ka bank kiba ioh na ka bynta ki kam ba ki la pyndep.