“Shisien ba long nongialam, ngi la tip ba kawei ka kjat shabar, kawei ha phatok”

Khliehriat: Ka Seng Meghalaya People’s United Front-East Jaintia Hills Districts (MPUF-EJHD), mynta ka sngi ka seng ha ka jing phah khubor na U President jong ka seng u Michal Chyrmang, ka seng ka kwah ban kren da kaba shai sha ki nongshong shnong ka Bri u Hynniewtrep ba ka seng ka long kaba la khreh lypa ban kyrshan ia ka KSU ha kano kano ka por lada jia ba ka Ri bad ka jait bynriew, ka nangjur ha ka jing shah hiarthma ha ki briew kiba nabar.

“Ka seng kam salia ia ka jingshah kem, namar ba shisien ba la long u nongialam ngi la tip lypa ba kawei ka kjat shabar bad kawei ha phatok” ong katei ka seng.

“Ka seng ka kyrpad ia baroh ki sengbhalang kiba don hapoh ka Bri u Hynniewtrep jong ngi khamtam ia ka HYC hapoh ka jingialam U Bah Robert Kharjarin ban ialong kawei bad ban klet ia ki por ba la dep bad ia la ka lama ba ngi don, ka seng ka kyrpad to ngin buh iaka jaidbynriew jong ngi ha khmat kampher ba ka ishu ka dei ka jongno jongno, hynrei ia mynta ngi donkam ia ka jingiatylli khnang ba ngin ym shah iuhroit ha u nongwei bad kawei nga kwah ban ong lada ngim ia tylli kawei ha kum kine ki por,ki nongshun kin iohi iaka jingtlot ka jait bynriew jong ngi bad kin nangnud shuh shuh ban pyni bor ia ka jait briew jong ngi”.

La ong shuh shuh ba ka seng ka sngewsih ban iohi ba ladon ba u jor ia u president ba Rangbah ka KSU ibah Lambok Star Marngar ha uta u president ka BJP cachar Districts uba kyrteng u Amitesh Chakraborty bad sa ka jingmaham na kawei na ki seng lehnoh ki Bengali bad Banga Bhumi kata ka United Bangal Liberation Army(UBLA).Na ka liang ka seng ka pynrem jur ia u Amitesh halor ka jingujor khlem nongrim jong u ia U president Rangbah ka KSU bad ka seng ka pynrem jur kumjuh ia ka seng lehnoh ka United Bangal Liberation Army ki bymtip ia ka dang ka duh hynrei ki wan lushia ia ka KSU bad ia ka Ri u Hynniewtrep.

Ka seng ka pynrem jur bha khamtam ia u lat barim ka Meghalaya u Tathagtha Roy, halor ka jingthoh jong u ban dawa khein seng lehnoh ia ka KSU kum ka HNLC kaba u paidbah ka Bri u Hynniewtrep da lei lei yn nym lah ban pdiang, ong ka kyrwoh na U president ka seng (MPUF-EJHD)Michal Chyrmang.