“Shisien ba la mih madan, ka dei beit ka phainal”

Shillong, 28 Jymmang:
“Shisien ba la mih madan, ka dei beit ka phainal bad kam lah ban ialehkai khlem don ba thep kol” ong U MLA jong ka seng UDP, haba iakren bad U Rupang mynta ka janmiet.
Haba iakren halor ka jing iatreilang jong ka seng HSPDP bad ka UDP, ha ka elekshon 2018, utei u rangbah, ula ong “Dei ban burom ha ki jaka ba don ki MLA. Lada ym burom, kan myntoi aiu” ong shuh shuh utei U MLA, u bym kwah ban pynpaw kyrteng.
Ka jingiatan tyllai, ka jur bha ha kine ki sngi, ha ki katto katne ki Constituency ba kitei ki seng trai ri, ki khlain baroh arliang, namar ba ki kandidet jongki, ki kwah ban iakhun beit ha kane ka elekshon 2018 bad kitei ki kynthup ia ka Mylliem, ha kaba ka don ka MDC na ka seng HSPDP bad nangta sa u kandidet jong ka UDP, uba ju ia khun beit ha kine ki sien ba ladep bad nangta ka Mawkynrew, ha kaba U bah Martle Mukhim MLA barim, ula pynbna, ba un iakhun beit na ka seng HSPDP, kaba dei ruh ka Constituency jong U MLA ka seng UDP bad nangta sa ka Mairang, kaba ju dei ka ktem jong ka HSPDP bad nangta ka UDP pat ka don ia U MLA jongka na katei ka Constituency, nangta ka Mawthadraishan ha kaba ka HSPDP, ka don ia U MDC, uba dang shu jop shen, katba ka UDP, ka don ia U MLA na katei ka Constituency bad kumjuh ka Sohiong ruh kaba don ia U MDC na seng HSPDP, katba kaba ju dei ka ktem jong ka UDP.