Shillong, 18 Nailur:
U trai jong ka CMJ University, u Chandra Mohan Jha, u la leit mih ialade ha ki pulit jong ka Sardar Police Station, ha ka por 3.30 nohsngi mynta ka sngi. Ha katei ka jingleit U Jha, ula don khyndiat minit ha katei ka thanat bad hadien kata, ula mih noh bad la ioh khubor, ba U Jha, u sah mynta ka miet ha Pinewood Hotel, Shillong. Haba la wad jingtip, na Pinewood, la iathuh ba U Jha, ula bat kamra, na ka bynta mynta ka sngi bad haduh lashai, ha katei ka Hotel.
Na ka liang jong u nongiasaid ain jong u CM Jha, u SP Sharma u la iathuh ba u CM Jha un leit ban jubab ha ki pulit kiba la khot hajir ia u tangba u la ong ba ki pulit kim donkam ban kem ia u namar u la dep ioh ia ka jamin (bail) na ka Supreme Court.
U la iathuh ba ki pulit ki la buh ha ka 20 tarik mynta u bnai, ha kaba ki la khot hajir ia u CM Jha na ka bynta ban tohkit bad mynta u la don ha Shillong bad ka jingsdang na ka bynta ban leit ai jubab hakhmat u ophisar uba tohkit halor kane ka bynta ka la iaid shakhmat, u la bynrap.
Ha kawei pat ka liang u SP Sharma u la wanrah ruh ryngkat bad ka hukum ba la pynmih da ka Supreme Court kaba la bthah ia ka sorkar jylla ba kan pan jingshai na ka CMJ University ba kan jubab hapoh 3 bnai halor ki kynrum kynram bad ka jingkynnoh pyndonkam bakla bad bym biang ka rukom pyniaid jong ka CMJ University.
U SP Sharma u la ong ba, na ka liang jong ka sorkar jylla kam long kaba donkam ban shu ngeit beit ia ka jingai jingmut u Governor ka jylla ba mynshuwa uba la ai jingmut ia ka sorkar jylla ba kan hukum pynwai noh syndon ia kane ka University.
U la ong ruh ba ia ka CMJ University la mynjur da ka ain CMJ University Act, 2009 bad katkum ka section 48 ka la kdew shai ba lada don kano jingbym biang ia ka rukom pyniaid, ka jingduna pisa lane kino kino ki kynrun kynram ka sorkar shuwa ba kan hukum khang ka dei ban pan jingshai shuwa bad lada kam hun ka lah ban shim da kano kano ka rai lane ban hukum khang noh syndon.
U la ong ba katum ka hukum jong ka Supreme Court ka long ba ka sorkar jylla ka dei ban ai ia ka jingbthah ia ka CMJ University ba kan pynbeit ia ki kynrum kynram hapoh 3 bnai bad lada ka sorkar kam hun ia kane, hangta ka lah ban shim ia ka rai ban pynwai noh syndon ia ka University.
Haba kylli pat ba ki bor pyniaid ka University ki long ne em kiba la kloi ban pynbeit ia ki kynrum kynram, u la ong hooid ki kwah ban pynbeit ia ki jingduna bad ruh ban dang bteng ia ka jingpyniaid ia kane ka University namar la dep ban theh pisa da ki klur tyngka na ka bynta kane kane ka university.
Haba kylli pat kaei ka lawei jong ki samla pule jong kane ka University u la ong, ka lawei jong kine ki samla ka shong ha ki lai bnai ban wan ynda haba ka sorkar jylla ka la ai ia ka jingbthah ban pynbeit halor kine kynrum kynram kumba la bthah da ka Suprme Court jong ka Ri India.
Phi don ban ong eiei?