Shimti U Jolly kum u AOC ka IAF

Shillong,
3 Kyllalyngkot:
U Air Marshal RK Jolly uba la ioh ia ka khusnam Vayu Sena Medal Vishisht Seva Medal ADC ha ka 1 tarik u kyllalyngkot u la shimti thymmai kum u Air Officer Commanding-in-Chief jong ka Eastern Air Command, IAF. La leh burom ia u da ki shipai suin ka IAF ha Head Quarter ka EAC ha katei hi ka sngi.
U Jolly uba long ruh u Gold Medalist (BA) na Delhi University bad uba la pyndep ia ka jingpule ha ka National Defence Academy bad kumjuh ruh ha ka Defence Services Staff College, u la ia soh bad ka tnad shipai ha ka 11 tarik u naitung 1975. U dei ruh uba la don jingtbit ha suin ha ka ba u la pynlut por haduh 3800 kynta ha suin naduh ka por ba au la rung sha ka kam shipai. 38 snem ha ka jingshakri jong u ha katei ka kam u la mad lut ban pynher ia ki kali suin ba kynthup ia ka Hunter, Marut, bad baroh ki jait MiG-21 , u dei ruh u nonghikai ha ka liang bana her suin.
U la ioh ia ka khusnam   Vayu Sena Medal ha u 1997 bad ka Vishisht Seva Medal ha u 2003 namar ki jingshakri kiba u la noh syniang ha ka kam shipai. La thung ruh ia u kum u ADC sha u President ka Ri. Ka lok jong u ka Mrs Meenakshi Jolly ka dei ka longkmie kaba bat mynta ia ka kam President jong ki lok ki shipai suin ne ka President Air Force Wives Welfare Association (AFWWA) Regional, ka la bat ia katei ka kam naduh ka 1 tarik mynta u bnai, ia ka ruh la pynkupburom kumjuh hi ha HQ Eastern Air Command, Shillong.