Shimti ka KHADC shipor, ban pyniaid ia ka Shella

Shillong, 8 ’lyngkot:
Ka Khasi Hills Autonomous District Council ( KHADC) ka la pyn kut noh ia ka kynrum kynram ha Shella Confederacy kaba ia dei bad ka kam Wahadadar da kaba shim ia ka jingsynshar ba shipor da lade hi. Ia katei ka kam la pynkut ha ka 23 tarik u nohprah 2014 bad ha katei ka juh ka sngi la thung ia u Joint Secretary ka KHADC u bah Reful Wanniang kum u Administrator ban pyniaid ia ka kam jong ka Shella Confederacy shipor.
Haba ia kren bad katto katne ngut ki nong thohkhubor, u bah K.P Pangniang, EM ka Elaka u la ong ba u bah Wan niang un dei u nongpyn iaid ba shipor ia ka Shella Confederacy haduh ba ka KHADC kan ioh ban pynlong ia ka elekshon Wahadadar, tad haduh ban da ioh ia u Wahadadar uba pura. U la ong ba katei ka jingsynshar ka KHADC ia ka Shella da lade hi ka long hadien ba ka samoi treikam jong u Wahadadar u bah Soutish Youroin ka la kut noh.
Shuwa ban shim ia ka bor synshar halade , ka KHADC ka la ailad ia u Wahadadar barim u bah Soutish Youroin ba un bat biang ia katei ka kam tang shisngi kata tang ha ka 22 tarik u nohprah 2014, bad katei ka shisngi ka dei ruh ka sngi kaba kut noh ka samoi treikam jong u Wahadadar kumta ha ka sngi kaba bud ka la thung noh ia u nongpyniaid uba napoh ka Council ha Shella Confederacy. Lah ban kdew ba ki kynrum kynram ha kaba ia dei bad ka kam Wahadadar ha Shella ki la mih namar ki jingujor kiba la poi sha Distrcit Council, haba la kylli na u EM shaphang ki jingujor u la ong ba ka rai ba ka KHADC ka la shim ka dei katkum ki kyndon kiba la don ha ka Appointment of Chiefs and Headman Act 1959.