Shimbynta u MLA ha ka sngi ba pynkut ka RBCSU ia ka College Events ki samla pule ha Ri Bhoi College

Nongpoh, 31 Risaw: Ka College Events ba shi taiew lynter jong ki samla pule ha Ri Bhoi College, kiba don hapoh ka lama Ri-Bhoi College Student Union (RBCSU) bad kaba la sdang naduh ka 25 tarik mynta u bnai, la pynkut noh mynta ka sngi hapdeng ka jingiphuh iphieng, kata da ka jingiashimbynta ba shitrhem da ki samla kiba pule hapoh katei ka Kolej.
Katei ka College Events 2024, ka dei halor ka phang “The dreams of today are the realities of tomorrow” la wan ban pynhap pyrda noh da u Bah Mayralborn Syiem MLA ka Nongpoh kum u kongsan, nangta u Bah RR Makdoh ba dei uwei na ki dkhot jong ka Governing Body jong katei ka College, u EC Benny Principal, ki nonghikai lem bad ki samla pule jong katei ka College.
Ha katei ka sngi na ka liang ka RBCSU lem bad ki bor pyniaid jong ka Ri-Bhoi College kila pyndon burom ruh ia ki riew rangbah kiba la noh synniang shibun ia ka Kolej bad kiba la don bynta naduh ba sdang seng ia katei ka Kolej.
Haba kren ha katei ka sngi kum u kongsan u Bah Mayralborn Syiem u la pynpaw ka jingsngewnguh kaba khraw ban don bynta lang bad ki samla pule ha kane ka jingrakhe, namar kum ki samla nalor ka pule ka puthi ki donkam ka jinglehkmen ban heh ban san bad ban iar ka jingmut jingpyrkhat ban sam ïaka jingstad bad khamtam ban tip ruh ia ka sap kaba ki don ha ka jingim jong ki.

Caption: U MLA ha ryngkat ki heh nongialam ka KSU lem bad ki khynnah skul ha Jatalong
Plie u MLA bad ki heh KSU ia ka kamra klas ba thymmai ha skul ba seng ka KSU ha Jatalong
Nongpoh, 31 Risaw: U Bah Charles Marngar, MLA Mawhati, nangta u Samla Lambokstarwell Marngar, President rangbah ka KSU Sengkmie, mynta ka sngi ki la leit ban plie paidbah noh ia ka kamra klas ba thymmai bad ruh ia ka jingker jong skul kaba la pynshna da ka KSU bad kaba la tip kum ka Maitshaphrang Lower Primary School kaba don ha shnong Jatalong, Block-2.
Ha katei ka sngi, nalor ka jingdon u MLA bad President rangbah ka KSU, la sakhi ruh da ka jingdon u BDO Bhoirymbong, ki nongialam ka KSU, ki nongialam shnong, ki nonghikai bad ki khynnah kiba pule hapoh katei ka skul, kaba dei ruh kawei na ki skul ha khappud.