Nongpoh, 14 Lber: Ka 3rd Prof. Barrister Pakem Memorial Sports Meet 2025, ne ka lympung ialehkai Sports ba shisngi, ia kaba la pynlong da ka KSU RIST-USTM Unit mynta ka sngi ha skulbah University of Science & Technology Meghalaya (USTM), ka la long kaba ishongkun bad ia kaba la wan ban iashimbynta lut da baroh ki samla Khasi kiba pule ha RIST bad USTM.
Ha katei ka sngi ba ka KSU RIST-USTM Unit ki la pynlong ia katei ka Sports Meet hapdeng ki samla Khasi, la jan baroh ki samla Khasi kiba pule hapoh katei ka skulbah, ki la wan ban iashimbynta ha ki jingialehkai, kiba kynthup ia ka jingiakop tan tylli, mareh, Mawpoin, Futsal lem bad shibun kiwei pat ki jait jingialehkai.
Katei ka Sports Meet ba shisngi jong ka KSU RIST-USTM Unit, ka dei kaba la sdang naduh ka por 9 baje mynstep, ia kaba la leit ban plie pyrda da u Samla Johny Nongrum, Sports & Cultural Secretary ka KSU NKHD bad la pynkut ha ka por 4 baje janmiet, ia kaba la pynhap pyrda da u Samla Shelkitbok Kharbani, Asst. General Secretary ka KSU Sengkmie kum u Kongsan bad u Samla Ferdynald Kharkamni, President ka KSU NKHD Unit kum u Symbud Kongsan.
Haba iadei bad katei ka Sports Meet ia kaba la pynlong da ka KSU RIST-USTM Unit, na ka liang ki nongialam ka KSU NKHD, kiba kynthup ia u Samla Shelkitbok Kharbani, nangta u Samla Ferdynald Kharkamni bad u Samla Johnny Nongrum, ki la ai ka jingiaroh ia kitei ki nongialam, namar ba ki la shimkhia ban pynlong ia katei ka Sports Meet, ha kaba nalor ba ka long kum kawei na ki bynta ban kynmaw kyrpang ia u Prof. Barrister Pakem, hynrei ka long ruh kum shi bynta ban wanrah ia ka jingiatylli hapdeng ki samla Khasi kiba pule hapoh katei ka skulbah.
Shuh shuh, ki la ong ruh ba ka jinglah ka KSU RIST-USTM Unit ban pynlong ia katei ka Sports Meet, kan long ruh kum kawei na ki sienjam ba ka seng ka la lehbha na bynta ki samla pule, khnang ba kin lait na ki jingshah pynshoi ha ki jingdih pynbuaid ba laiphewjait.
Phi don ban ong eiei?