Shimbynta ki khynnah JNV Niangbari ha ka “Pariksha Pe Charcha” ka prokram ba u Myntri Rangbah ka ri, u iakren bad ki khynnah

Nongpoh: Ki khynnah skul ka Jawahar Navodaya Vidyalaya, Niangbari, Ri Bhoi District, myn hynnin ka sngi ki la iashimbynta ha ka prokam kaba la tip kum ka “Pariksha Pe Charcha” ka prokram kaba u Narendra Modi, Myntri Rangbah ka ri, u la buh ia katei ka prokram ban iathir jingmut bad ki khynnah skul, ki nonghikai bad ki kmie ki kpa ha ri India baroh kawei.

Katei ka prokram kaba la tip kum ka “Pariksha Pe Charcha”, ka dei kaba la pynlong ha ka sien kaba 5, ha kaba ka jingthmu jong katei ka prokram ka long ban ai jingmut, ai mynsiem ia ki khynnah skul ki ban ialeh Exam ba kin lait na ki jingjynjar jingmut bad jingtieng ha ka por ba ki iakhun ia ki Exam bad ba kin thoh khlem kano kano ka jingtieng jingsyier ne pynjynjar jingmut ia ki khynnah.

Haba iadei bad katei ka prokram, u Subhash Ch. Ramchiary, Principal, ka JNV, u la ong ba kumba la btah da ka ka sorkar ba ki skul kiba don ha ka thup CBSE ki dei ban iashimbynta ha katei ka prokram, khnang ba ki khynnah kiba pule ha kiba kum kitei ki skul, ba kin lait na ka jingtieng jingsyier haba ki thoh ia ki Exam kaba la pynlong da ka CBSE.